Dei ban ïatai ha Assembly naduh lano yn pyntreikam ïa ka Roster System:High Court

Shillong, Ïaïong 03: Ka High Court of Meghalaya mynta ka sngi, ka la ong ba ka shong ha ka Ïingdorbar Thawaiñ ka jylla bad ka sorkar lano kan pyntreikam ïa ka Roster System ha ka Reservation Policy jong ka jylla Meghalaya.
Haba shim bishar ïa ka PIL jong u Greneth Sangma, ka ïingbishar jong u Chief Justice Sanjib Banerjee bad u Justice W. Diengdoh mynta ka sngi, ka ong ba kadei kamram jong ka Assembly bad ka sorkar ban ïakren bad ïatai halor ka Roster System bad kam shym la buh kano kano kano ka por ban pyntreikam ïa ka. “Hynrei ka paw ba ka Assembly kam pat shim ïakren ne shim kano kano ka rai halor kane”, la ong ka ïingbishar.
Ka ïingbishar ka la ong ruh ba kadei ka jingtreikam jong ka sorkar lane ka polisi treikam jong ka ba kan shim ïa ka rai haduh katno ka lah ban ran shadien ban pyntreikam ïa kane ka System. Shuh shuh ka ïingbishar ka la shim bishar ïa kane lyngba ka suo moto dei hadien ba ka la lap ba ka Reservation Policy jong ka sorkar Meghalaya kam shym la don ka Roster System naduh ba la sdang pyntreikam ïa ka.
Ka ïingbishar ba hakhlieh duh jong ka jylla kala ong ruh ba ka paw ïa kane ka kam la shi shim bad pyntreikam beit khlem da ïakren ïa ka jingdonkam bad ka jingktah jong ka. Ka la ong ruh ba ka jingujor PIL halor ka jingpyntreikam ïa ka Roster System ka paw ba kadei ka jingpyrshang ban pynjngut ïa ka um kaba la khih phaloh lypa bad dei namar kata ka daw dei ban pynduh noh ïa kane ka jingujor.
Halor kane ka rai jong ka ïingbishar High Court of Meghalaya, u la ong ba kane ka hi ka pynpaw ba kaei kaba ka ka VPP ka la rah ha Assembly ïa kane ka kam kam dei satia kaba bakla, hynrei kadei kaba biang palat ban ïakren namar ba na ka liang jong u, haba u rah ïa kane ka mat ha Assembly kam mut satia ba u pyrshah ïa ka Roster System, hynrei ban pynsangeh shuwa tad haduh ban da pynbeit bha ïa ka Reservation Policy.
Halor ka jingpyntreikam ka sorkar MDA- I ïa ka Roster System naduh u snem 1972 da kaba aidaw ba kadei ka jingbthah jong ka ïingbishar, u Bah Ardent u la ong ba ka paw ba u Myntri Rangbah ka jylla, Conrad Sangma, u la ïalam bakla ym tang ïa ki paidbah, hynrei ïa ka Assembly ruh, namar ba ka ïingbishar kam khlem buh por, hynrei ka ailad ïa ka Assembly ban shim ïa ka rai. “Kane kadei ka buit jong ka sorkar na ka por sha ka por ban riehtngen beit ha ka ïingbishar. Hynrei ym phylla namar kadei ka sorkar kaba tlot bad ki nongïalam ruh kiba tlot”, u la ong.
Halor ka jingkdew kiba bun ba ïa kane ka kam dei ban rah beit hakhmat ka ïingbishar namar ba kadei ka rai jong ka ïingbishar, u Bah Ardent u la ong ba shuwa ban rah ïa kane ka kam ha Assembly, u lada pyrkhat bad um ïohi ba kan don jingeh eiei namar ba kadei ka kamram jong ka ïingdorbar ban thaw aiñ, ym ka ïingbishar. “Haba ngi leh ïa kano kano ka kam, ngim da pyrkhat bha, ym dei ba ngi shu leh shongshit”, u la ong.
Halor kane ka rai jong ka ïingbishar mynta ka sngi, u Bah Ardent u la pynpaw ka jingsngewkmen kaba jur da kaba ong ba kan long ka jingïarap kaba khraw ïa ki Samla jong kane ka thaiñ, kiba la mad bun ki jingeh namar ka jingpyntreikam ïa ka Roster System.
Lah ban kdew hangne ba ka VPP kala rah ïa ka Motion halor ka Roster Systen ha ka dorbar mangtyngka ba dang shu dep, hynrei kam shym la ïoh lad ban rah namar ka jingpynwai noh u Speaker ïa ka Assembly tang ha ka por 12 baje mynsngi. U Bah Ardent u la ïoh rah ban kren ïa kane ka kam ha ka jingïatai halor ka mang tyngka. Hynrei u Myntri Rangbah u Conrad Sangma ha ka jubab jong u, u la ong ba ka sorkar ka la pyntreikam halor ka jingbthah jong ka ïingbishar bad u la ban ruh ba kibym mon ïa ka jingpyntreikam ïa ka, ki lah ban leit sha ïingbishar.