Ka SPB kam dei ka jaka tang ban ïoh shong shuki hynrei ka ban saiñdur ïa ka lawei ka jylla : Metbah
Shillong, Iaiong 3 : U Chairman ka State Planning Board u bah Metbah Lyngdoh u la ong ka Board kam dei tang ka jaka ban shong shuki hynrei ka dei ka shlem ban saiñdur ïa ka lawei jongka jylla.
Hadien ka jingïakynduh ba nyngkong jong u Chairman bad ki Co Chairman mynta ka sngi u la ong “ Ngi don hangne ym dei tang ba la thung Chairman bad Co Chairman ne dkhot ban ïoh shong shuki hynrei ki don ka jingkitkhlieh ban saiñdur ïa ka lawei jongka jylla namar ka State Planning Board ka dei ka shlem ban saiñdur ïa ki kam pynroi pynpar bad kyntiew ïa ka jylla ha ki liang baroh. Kumta ngi don ka jingkitkhlieh kum ki dkhot ban shim khia ïa ka kam kumba la ibit ban tynrong ïa kane ka lyngkor ha ngi”.
“ Nga sngewkmen ruh ban pyntip ba baroh arngut ki Co Chairman kiba dei ki MLA ki don da kajuh ka thong bad ka mynsiem ban trei bad wanrah ki jingpynkylla ïa ki rukom treikam ka State Planning Board namar kim kwah ban ïoh tang ka shuki bad kiwei ki jingmyntoi hynrei ban trei ïa ka kam khamtam mynta ba dang dei u snem ba nyngkong eh namar kam myntoi ban shu ïoh tang ki jingmyntoi shimet na ka sorkar hynrei kaba kongsan ka kam” ong u bah Metbah.
U la ong “ Kane ka jingïalang mynta ka sngi ka dei tang ka jingpynithuh shwa iwei ïa iwei. Namar ka sorkar ruh kam pat pynmih ka hukum ban thung sa ïa kiwei ki dkhot jongka Board. Kumba long mynta ka Board ka don tang lai ngut ki dkhot kata ma u kum u Chairman bad arngut ki Co Chairman kiba dei baroh ki MLA”.
U la ong shuh shuh ba kumba ju long ki State Planning Board ba rim ki dkhot ki dei ban long naduh u Chief Secretary, ki Commissioner & Secretary, bad kiwei kiwei ki riewstad riewshemphang ha kiba bun ki bynta. Ka tnad Planning da ka jingïamir jingmut bad u Myntri Rangbah bad kumjuh ruh bad u Chairman kan sa thung ïa ki 4-5 ngut ki riewshemphang ne ki riewstad ban long ki dkhot jongka Board.
U Chairman u la ong “ Tang shu la dep thung ïa baroh ki dkhot ka Board kan sa treikam pura shaid shaid ban pynkhreh ïa ki jingai jingmut sha ki tnad sorkar bapher bapher ba kin pyntreikam na ka bynta ban kiew bad ïaid shakhmat ka jylla bad ka roi ka par.
“ Ngin sa ïa kynduh biang ha ka taiew ban wan bad ngin sa bishar ïa ki kam bad hadien kane ngin sa ia kren bad u myntri rangbah halor ki mat jingtreikam jongka Board bad kumno ban pynlong ïa ka Board kaba treikam pura.