Shillong, Jylliew 30 : Ki Rangbah Shnong ka thain Umsning hapoh ka kynhun Umsning Block Headman Forum (UBHF) ka la dawa ïa u Myntri ka Koit ka Khiah u Bah Wailadmiki Shylla ban leh ei ei noh kham kyrkieh halor ki jingduna kiba don hapoh ka Umsning Community Health Centre (CHC), haba maham ba ka jingbym biang ki jingdonkam kiba kongsan ka lah ban shim ïa ki jingim briew ha Ri-Bhoi District.
Ha ka shithi bala aiti ha ka sngi Ba-ar, ka Forum kaba mihkhmat ïa kumba 200 tylli ki Shnong kiba hap hapoh ka Umsning C&RD Block, ka la ong ba ka CHC ka dang dei tang ma ka na ki hospital Sorkar ba don ha ka thaiñ bad ka la treikam khlem ka jaka sumar ïa ki shynrang ne male wards mynta la jan shiphew snem.
“Kane ka buh ha ka jingkit kaba khia ïa ki nongpang kiba wan na ki longïing kiba duna ka jingïoh na ki jaka nongkyndong. Naba ka dei tang maka ka jaka sumar ka Sorkar ba don ha ka thaiñ, katto katne ki nongpang ki la shu duh ïa la ka jingim namar ka jingbym biang ki lad ai jingsumar” ong u President ka Forum u bah Franklin Nongrum ha ka dorkhas.
Ka Forum ka ong ba ka jingduna ki doktor ka dei kawei na ki jingsngewkhia kaba khraw, namar ka CHC ka khmih ïa kumba 250 tylli ki nongpang ha ki OPD ha ka shisngi, kaba kiew sha ka 400 ngut ha ka sngi ïew. Ka jingbun ka kam, nalor ka jingtrei miet, ka la ktah jur ïa ki katto katne ki doktor kiba don ha kane ka jaka sumar.
Wat hapdeng ka jingkyntiew kyrdan na ka PHC, ka CHC ka dang don shibun ki jingduna kiba donkam kat kum ki kyndon ka Sorkar, kaba pynbor ïa ki nongpang ban hap leit wad jaka sumar bad leh test sha kiwei pat ki jaka sumar.
Ka Forum ka pynpaw ba kane kala nang tynrong ïa ka jinglut kaba bun ïa kito kiba wan na ki longïing kiba duk bad kyntu ïa u Myntri ba un tuklar mardor ïa kane ka kam.
Ka la pynsngew ruh ïa ki jingduna ha ka Meghalaya Health Insurance Scheme, bad ong ba ka MHIS kan kham treikam bha lada ka siew pat ïa ki bill bai sumar haba ki test kim don satia hapoh ka CHC.
Ban pynsting ïa ka jingkit ha Umsning, ki Rangbah Shnong kila tyrwa ban shna ïa ka PHC ba thymmai ha Kyrdemkulai lane kyntiew kyrdan ïa ka Zero Point Sub-Centre ha ryngkat ka jingkyntiew kyrdan ïa ka Umsawlum, Mawlyndep lane Mawlang Sub-Centre.
Kane ka jingkyntiew kyrdan kan ïarap ïa ki nongshong shnong na ki thaiñ Eastern-West kiba shaniah tylli ïa ka Umsning CHC, ong ka shithi.
Ka Forum ka la ai jingmut ruh ban buh ïa ka mobile blood donation vehicle ban kyrshan ïa ki nongpang bad pynsuk ïa ki briew na ki jaka nongkyndong, ki skul bad ki jaka trei ba kin synniang snam khlem da donkam ban wan sha ki hospital.
