Halor ka SIR leit ai jingthoh ka SWKHD Congress Committee ha ka District Administration

Mawkyrwat, Jylliew 30: Ka South West Khasi Hills District Congress Committee da ka jingsngewkhia ka la aiti ïa ka jingthoh (representation) sha ka District Administration jong ka South West Khasi Hills District ban pynpaw ïa ki jingai jingmut bad ki katto katne ki jingbthah halor ka Special Intensive Revision (SIR) kaba dang ïaid mynta ïa ka Electoral Roll.
Ha ka jingthoh, ka Committee ka la pdiang sngewbha ïa ka sienjam jong ka Election Commission of India ban pynlong ïa ka Special Intensive Revision, da kaba ong ba ka Electoral Roll kan long kaba khuid, kaba thikna bad kaba shai ka long kaba donkam tam ban ïada ïa ka hok bad ka jingïaineh jong ka synshar paidbah.
Haba kren sha ki lad pathai khubor, u Bah Kynpham V. Kharlyngdoh uba dei u President jong ka South West Khasi Hills District Congress Committee, u la ong ba namar ba ka South West Khasi Hills District ka dei ka distrik kaba don ha khappud bad ka ri Bangladesh, kumta ka long kaba donkam ïa ka jingpeitngor kaba kham jur ha ka por halor ka jingpyntreikam ïa ka Special Intensive Revision (SIR).
Ym tang kata, u la ban jur ba ka jingpynshisha ïa ki kyrteng bad ki kot ki sla dei ban leh da ka jingphikir kaba khraw, khnang ba yn ym pynrung kyrteng ïa kino kino ki nongwei ne ki briew kiba ym dei hok ban long ki nongthep vote ha ka Electoral Roll. U la maham ruh ba kano kano ka jingbym biang ha ka jingpynshisha ka lah ban ktah ïa ka jingtreikam jong ka elekshon bad ruh ïa ka jinglong jong ki trai shnong, kaba lah ban wanrah ïa ki jingeh ha ka liang ka imlang sahlang, ka saiñ pyrthei bad ka jingïada ri.
Ka Committee ka la kyrpad ïa ka District Administration ba kan pynlong ïa ka jingjurip kaba bniah ha ki shnong ki thaw bad ka jingbishar kaba pyrkhing ïa ki kot ki sla katkum ki kyndon jong ka Representation of the People Act, 1950, ka Registration of Electors Rules, 1960, bad kaba la pynmih da ka Election Commission of India.
Ka Committee ka la ban jur ruh ïa ka jingdonkam ban ïashimbynta lang naduh ki BLOs, ki Dorbar Shnong bad ki Sengbhalang (NGOs) kiba la ithuh ha ka kam jong ka jingpynshisha ïa ki briew. Katkum ka jingong jong ka Committee, kine ki kynhun ki tip bha ïa ki nongshong shnong ha ki shnong jong ki bad kin lah ban ïarap ban ithuh ïa ki nongshong shnong ba dei hok, ban ïada na ka jingpynrung bakla ïa ki briew kiba ym dei hok bad ban pynkhlaiñ ïa ka jingshaniah paidbah bad ka jinglong jong ka jingpynbeit ha ka Electoral Roll.
Ha kajuh ka por, ka Committee ka la ban jur ba ymdei ban pynduh ïa kano kano ka hok riti synshar jong ki nong India kiba dei hok ban don kyrteng ha ka Electoral Roll. Ka la kdew ruh ba bun ki nongshong shnong kiba dei hok na ka distrik ki dang don shabar shnong namar ka jingpule, ha ki kam ba ki leit trei, ka khaïi pateng, ne kiwei pat ki daw ba ki hap ban mih na shnong. Kumta, ki la kyrpang ba ïa kiba kum kine ki briew ki dei ban wad bniah khnang ba kin nym shah weng kyrteng tang namar ba kim don ha shnong ha ka por ba pynlong ïa ka jingpynshisha.
Ka Committee ka la pynpaw ruh ïa ka jingsngewkhia ba bun ki nongshong shnong, khamtam kiba sah ha ki shnong kyndong, ki longïing kiba duna ka jingïoh jingïarap bad ki briew kiba la tymmen, ki dang artatien ban pynbiang ïa ka Electoral Photo Identity Card (EPIC) lane kiwei pat ki kot ki sla ba donkam namar ka jingbym tip, ka jingbakla ne ka jingbym ïoh jingpynshai kaba biang. Kumta ka la buh jingkyrpad ïa ka District Administration ba kan pynlong ïa ki prokram ai jingtip bad jingpynshai sha ki paidbah khnang ba kin sngewthuh bha ïa ka rukom treikam bad kin lah ban pyndonkam ïa la ka hok paidbah khlem kano kano ka jingartatien.
Shuh shuh, ka Committee ka la kyrpad ba dei ban pynlong ïa ka jingpynbna paidbah kaba kham bniah halor ka tarik, ka rukom treikam, ki kot ki sla ba donkam bad ka rukom ujor, khnang ba baroh ki nongthep vote kiba dei hok, kin ïoh ïa ka lad kaba biang ban ïashimbynta ha ka jingpynbeit ïa ki Electoral Roll.
Ka jingthoh ka la kyntu ruh ïa ka District Administration ban pyntreikam ïa ka jingpynshisha kaba pyrkhing bad kaba bniah, khamtam namar ba ka distrik ka don ha khappud bad ka ri Bangladesh; ba ki shnong lane ki Dorbar Shnong bad ki NGOs kin don ka jingïatreilang; ban pynlong ïa ki prokram ai jingtip sha paidbah; ban ïada ïa ka hok thep vote jong ki samla pule, ki nongtrei, ki riew paidbah bad ki nongshong shnong kiba don shabar shnong shipor; bad ban thaw ïa ka rukom treikam ba bniah bad ba shai khnang ba baroh ki nong India kiba dei hok kin ïoh ban don kyrteng ha ka Electoral Roll katkum ka aiñ.