Dawa ka JNC-KC ïa u heh sorkar ka tnat Tourist-Information Centre Khliehriat ban pynshai halor ka jingbym poi trei mynta la shi snem

Khliehriat nailar 31: Ki nongïalam bad ki dkhot jong ka Jaiñtia National Council Khliehriat Circle, hapoh ka jingïalam u General Secretary, u bah Mebanteilang Sukhlaiñ, mynta ka sngi ki la leit jurip ïa kawei ka tnat treikam jong ka sorkar ka ‘Tourist Officer and Information centre’ ka ba don ha Khliehriat bad ki la lap ba watla ka ophis ka plie hynrei ym don nongtrei ha katei ka ophis bad don tang u peon.
Hadien ka jingwad jingtip, ki dkhot ka seng ki la ioh jingtip ba u heh sorkar (officer) uba dei peit ia katei ka Centre um ju poi sha ophis mynta la don kumba shi snem, kane ka la pynsah umdum ïa ki nongïalam bad ki dkhot jong ka seng, kumta na ka liang ka seng ka la dawa na utei u heh sorkar jong ka tnat Tourist Officer and Information centre Khliehriat bad u dei ban ai ka jingpynshai halor ka jingbym poi trei jong u mynta la don kumba shi snem, namar kane ka jingbym don u heh sorkar ka buh jingeh ïa ki paidbah kiba donkam ha ki kam ki jam ban kyntiew ïa ka kam jngohkai pyrthei ha ka district.
“Ka seng ka buh jing jingkylli ruh ba ka sorkar ka ai tulop ne em ïa kine ki nongtrei bym ju wan sha ophis?, kumba la pawshai, ba bun ki jaka jnngohkai kiba don ha kane ka thaiñ bad ki donkam shisha ban ioh ïa ka jingiarap bad jingkyrshan na katei ka tnat treikam khnang ban wanrah jingmyntoi ym tang ïa ki shnong ki thaw hynrei ïa ka jylla hi baroh kawei, ka seng ka kyntu ruh ïa ka sorkar ba kam dei ban shu lehkai ïa ka pisa jong u paidbah”
Ka jingliet jurip jong ka seng ïa katei ka tnat treikam ka dei namar ba ka seng ka la ioh ïa ka jingujor na kiba bun ki nongshong shnong, kiba la ju ujor ba ym ju don bad kim ju iakynduh ïa u heh sorkar (officer) ha katei ka ophis ‘Tourist Officer and Information centre’
Na ka liang ka JNC Khliehriat Circle ka kren da kaba shai ïa u heh sorkar uba peit ïa katei ka tnat jngohkai pyrthei (Tourism) kaba don ha Khliehriat ba “Lada ka jia ba um don mon ban trei na ka bynta ka bha ka miat jong ki paidbah na ka liang ka seng ngi pynrem jur bad kyntu rih ïa ka sorkar kaba dei ban peit bad ban tuklar halor kane bad dei ruh ban pynshai na kaei ka daw kaba la pynlong ïa katei ka ophis ban long thylli, namar kane ka ophis ka dei ban peit ïa ki kam jngohkai pyrthei hapoh ka district”
Halor kane, ka seng ka la leit ban ïakynduh ruh bad u Deputy Commissioner ka East Jaiñtia Hills District, u A. Baranwal,IAS bad kyntu ba ïa u ba u dei ban leh ei ei halor kane ka jingbym don nongtrei ha katei ka ophis treikam.