Dawa ka HYC-EJH na u DyCM ban wanrah mardor da ka Police Outpost ha ka thaiñ Bataw
Khliehriat Nailar 07: Ka Hynñiewtrep Youths’ Council (HYC) East Jaiñtia Hills District ha ka 6 tarik Nailar ka la leit ïakynduh ïa u Symbud Myntri Rangbah ka jylla u Bah Sñiawbhalang Dhar bad aiti ïa ka dorkhas ban dawa wanrah mardor da ka Police Outpost ha ka thaiñ Bataw ka Shnon kaba don ha khappud bad ka Bangladesh.
Ka seng ha u kyrwoh lyngba u president u Bah Preios Pale ka la ong kumba ka long mynta, ka thaiñ Bataw ha ryngkat kiwei pat ki shnong ba marjan kum ka Lakadong, Lama, bad Borkhat ki hap hapoh ka jingpeit jingkhmih jong ka Lad Rymbai Police Outpost kaba hap hapoh ka Khliehriat Police Station bad ka Outpost kumjuh ruh ka Police Station ki la jngai bah na ki shnong khappud ba ki shong ki sah.
Ki nongïalam ka seng ki la pynpaw ba kane ka rukom treikam kaba la don mynta ka la nangduna ha ka jinglah ban pynbiang namar ka jingjngai jong ka jaka bad ka jingnang kha roi jong ki nongshong shnong hapoh ka thaiñ.
Ki mat ba kongsan ba la pynpaw da ka seng ha kane ka jingïakynduh ka long halor ka jingslem jong ki pulit ha kaba ïadei bad ki kam aijingïarap bad ki jingdonkam ba kyrkieh ïa ki paidbah namar ka jingjngai hapdeng ka Lad Rymbai Police Outpost bad ka thaiñ Bataw.
Ka seng ka la ong ba ka jingduna ha ka jingdon jong ki bor pulit ha Lad Rymbai ka la pynkynduh jingeh ban pynïaid ïa ki kam ha ka thaiñ kaba ïar, bad kaba pynshem jingeh shibun ha kaba ïadei bad ka jingpynbiang ïa ki bor pahara na ka bynta ki kam shongshngaiñ khamtam sha ki shnong kiba pajih kiba don ha ki thaiñ bad mar jan bha bad ka khappud.
Kumta ka seng ka la pynpaw ïa ka jingdonkam kyrkieh ïa ka Police Out Post ha ka thaiñ Bataw khnang ban lah ban peitngor ïa ki jaka rung jaka mih ba kongsan khamtam haba phai sha ka surok Shillong-Silchar Speed Corridor kaba dei ban hap ïaid lynba kine ki shnong.
Haba jubab halor kane ka jingdawa, u Bah Sñiawbhalang u la kular ba na ka liang ka sorkar kan bishar bniah bad shim khia khnang ïa kane ka kam bad kan shim ïa ki sienjam kiba donkam ban aijingmynjur halor ka jingdonkam ïa ka jingtei bad ka jingpynbiang ïa ki bor pahara khnang ban lah ban pynkhlaiñ ïa ki kam shongshngaiñ bad ban pynbiang ïa ki lad jingïada bad ban pynïoh pat ïa ka jingshaniah jong ki paidbah hapoh ka thaiñ.