Shillong, Nailar 07: Ka kynhun ki Nongialam ka Synjuk Ki Nongsynshar Shnong Ka Bri U Hynniewtrep (SNSKBH) ha ka sngi Thohdieng, kila kyrpad ïa ka Sorkar jylla ban tuklar lem ha kaban nym pynlong aiñ ïa ka “Khasi Hills Autonomous District (Regulation and Administration of Land) Amendment Bill, 2026”.
Ka Synjuk kala buh ïa kane ka jingkyrpad hakhmat u Myntri Rangbah Conrad K Sangma, bad Symbud Myntri Rangbah ba khmih ïa ka District Council Affairs, Bah Prestone Tynsong.Kala aiti ruh ïa ka dorkhas bad ka jingpynbna (notification) ba ïadei bad ka jingbuh pud ïa ka jingdon jaka.
Ha ka dorkhas, ki nongialam kila ïathuh ba ka KHADC, ha ka dorbar ba long ha u bnai Jylliew 2026, kala mynjur ïa ka Amendment Bill, 2026.
Ka Amendment ka weng noh ïa ka kyndon ha ka kyndon 16 jong ka Principal Act, 2021, kaba donkam ïa ka Executive Committee ban ïasyllok bad ki Dorbar Shnong, Dorbar Raid bad Dorbar Hima hashuwa ba kin buh ïa u pud halor ka jingiapynbeit jaka, jingai bynta bad pynbynta kyrpang ïa ka jaka ka Raid.
Ka kynhun kala pynpaw ïa ka jingsngewkhia ba kane ka amendment kan pyntlot noh ia ka bynta jong ki bor treikam nala tynrai kiba don, da ki pateng la pateng, kiba treikam kum ki nongsumar ia ka synshar khadar nala tynrai.
Ki Khlieh Nongsynshar kila iapynlong lang ïa ka jingialang ha Shillong ha ka 7 tarik Naitung, 2026, kaba la shim ïa ka rai ba ïa mynjur lang, ban pyrshah ïa ka Bill.
Ka kynhun kala pynpaw ba:
1. Ka bill ka ïaid pyrshah ïa ka jingmut jong ka Principal Act bad ka Khasi customary land tenure system ne ka riti bat khyndew nala tynrai u Khasi.
2. Ka pyntlot ïa ka nongrim jong ka jingiatreilang bad ki bor Sorkar bad ka jingkhanglad ïa ka synshar paidbah ba shaniah ha kawei ka bor
3. La mynjur ruh ïa ka khlem ka jingiasyllok bad ki Dorbar Shnong, Dorbar Raid bad Dorbar Hima.
Kila kdew ruh ïa ka KHADC Order No.DCRBF/13/465/2026/14/161 bad 11 tarik Jylliew, 2026, kaba buh ïa u pud halor ka jaka raid khlem da bud ïa ka lynti ban ïasyllok kumba la pruid dak ha ka kyndon 16.
Ka kynhun kala pynpaw baka notification ka long kaba leh be-ain bad ka lah ban lam ïa ka jingkulmar jingmut ha u paidbah.
U Myntri Rangbah ula ïai ban ïa ka jingkut jingmut jong ka Sorkar ban ïada ïa ki bor tynrai nala tynrai, ka synshar khadar nala tynrai, ka hok jong ki trai muluk halor ka jaka puta bad ka jingai pateng kaba pher bha-kaba leit sha ka Kmie ha Meghalaya.
Ka kynhun kala pynpaw ïa ka jingsngewnguh ïa kane ka jingiakren kaba ai mynsiem.
