Shillong, Ïaïong 01: Ka seng Hynñiewtrep Integrated Territorial Organisation (HITO) ka la dawa ïa ka Executive Committee ka Voice of the People Party (VPP) ha Khasi Hills Autonomous District Council (KHADC) ba kan pynlong ïa ka jingtohkit ba bniah bad leh tyngeh pyrshah ïa ka jinglum khajna be-aiñ da ki khyrdop ka Council.
Ïa kane ka la pynpaw ha ka shithi ba la phah sha u CEM ka KHADC Bah S Rynjah, ha kaba ka HITO ka la ong, “Ngi dawa ïa ka jingtohkit ba mardor halor kine ki jingleh bym hok, dei ban shim da ka lynti ka aiñ pyrshah ïa kiba donkti bad pynduh noh ïa ki tender bad contract bala bat da ki trai jong ki khyrdop kiba shem leh thok, bad pynthikna ba kin nym ïohlad shuh ban aplai ïa ki tender lane contract shirta”.
Kane ka jingdawa ka la mih hadien ba kane ka Seng ka la ïohpdiang ïa ka jingtip halor ka jinglum khajna beaiñ da ki katto katne ki briew kiba don ha ki khyrdop ka KHADC, khamtam ïa kito kiba lum khajna na ki kali kiba kit mar.
La ong ba ha ka jingwad ïa ka jingshisha bad ka hok, ka HITO ka la ong ba ka la pynlong ïa ka jingjurip ha ki khyrdop khlaw jong ka KHADC ha Puriang, East Khasi Hills district, ha kaba la lap ïa ki sakhi kiba biang kiba pynskhem ïa kine ki jingkynnoh.
“Ka jingtohkit jong ngi ka la pynpaw ba uwei u briew uba don ka jingkitkhlieh na ka bynta ki kam ha ka khyrdop talasi u la lum pisa be-aiñ na ki kali kiba ïaid lyngba ka surokbah. Kaba pynsngewsih ka long ba ki nongñiah kali kiba pyrshah ïa kane ka jinglum pisa donbor ki la shah byrngem ban kurup ïa ki mar jong ki, kaba la wanrah ïa ka jinglong jingman ba pyntieng bad jingpynbor,” la ong ha ka shithi bad da kaba bynrap, “Ka la wan sha ka jingtip ba u trai jong kane ka khyrdop ula ai ka hukum ïa ki nongtrei, kaba pynbor ïa ki ban pyntreikam ïa kum kine ki kam bamsap”.
Ka la ong ba kane ka jingleh donbor ka long ruh wat ïa ki kali kamai, haba pynlong sohpdung ïa ki nongtrei bad ki nongbylla sngi kiba shaniah ïa ka kamai kajih da kaba khaïi ïa ki mar ba kongsan kynthup ïa u rnga bad ki lyntang. Kum kine ki jingleh ka pynpaw ïa ka jingbamsap kaba jur bad ka jingleh donbor kaba la pyni da kito kiba trei ha ki khyrdop.
Ka HITO ka la kam ba kane ka jingai khubor jong ka Seng ka dei kaba la pynshong nongrim na ki sakhi ba la kyrshan ruh da ki nongai sakhi bad ba ym dei ban ñiew ïa ka kum ki jingkam bym lah pynshisha. “Ngi long kiba kloi ban wanrah ïa ki sakhi satar bad ki jingai sakhi ban pynshisha ïa kine kiei kiei baroh haba donkam,” kam ka HITO.
Ka la ong ba ka long kaba sngewsih ba kane ka jingjia kam dei kaba shu jia ryngkhat, ka dei ka jingpynibor kaba la phai lyndet da ka bor synshar ka Council kiba la leit noh, kaba wanrah ïa ka jingjynjar ïa ki nongtrei bylla bad ki dkhot ba trei shitom jong ka imlang sahlang.
“Namar kata, ngi kyntu ïa phi ban shim khia pyrshah ïa kito kiba donkti la ka dei ki trai lane ki nongtrei jong ki khyrdop,” bynrap ka HITO.
