Nongpoh, Rymphang 17: Da ka jingangnud ban dang pynkhlaiñ ïa ka jingshakri sha ki paidbah ka jaid byrniew hapoh ka jylla, Meghalaya, ka HANM Ri Bhoi ryngkat ka sengkmie mynta ka sngi ka la pynkha sa ïa kawei ka tnad treikam ba la tip kum ka HANM, Nongpoh Circle ban ki nongïalam kin shim ïa ka lyngkor ban ai pat ka jngshakri sha ki paidbah ka thaiñ Nongpoh.
Ïa kane ka jingïalang pynskhem ïa ki nongïalam ba pura ka HANM Nongpoh Circle la wan da u President ba rangbah ka seng, u Bah Lamphrang Kharbani ha ryngkat ka jingdon lang u President ka District, u Bah Ajit Makri, lem bad kiwei kiweui ki nongïalam bad ki dkhot kane ka Seng na sengkmie bad na Ri Bhoi District.
Haba pynskhem ne pyntian smai ïa kitei ki nongïalam ka Circle la pynlong ha ka ïing Dorbar Hall, Sajer, Nongpoh, ha kaba u Bah Lamphrang Kharbani u la long u kongsan ban ai ïa ka jingpynskhem bad pynbam smai ïa kitei ki noingïalam kum kita ki nongïalam ba pura ka HANM Nongpoh Circle.
Ki nongïalam ba thymmai ka HANM, Nongpoh Circle ki kynthup ïa u President Donroy Kshiar, Vice president Khrawpyrkhat Thongi, General Secretary Wanteribor Makri, Assisant Secretary Honly Navin Marbaniang, Finance Secretary Aiborlang Suting bad kynthup kiwei kiwei de.
Haba ai jingkren ha kane ka sngi kum u President ba rangbah ka seng, u Bah Lamphrang Kharbani u la pynpaw ïa ka mynsiem jong ka jingkmen ba ki khun samla ki la wan ban pynïasoh sha ka seng shi bynta ban shim ïa kata ka lyngkor nongïalam ban trei na ka bynta ka jaid bynriew.
U la ong ruh ka seng ka don ha ka Nongrim ban peit ïa ka eh ka shon ka jaid bynriew bad dei namar kane ka daw ka seng ka pynïar ïa u tnum u tyndai ha kylleng ka bri u Hynñiewtrep khnang ba ki paidbah kin ioh ïa ka jingshakri lyngba ka ryngsan jong ka seng kaba ieng ban shakri ïa ka jaid bynriew.
Shuh shuh, ha kane ka sngi u la kyntu ruh ïa kine ki nongïalam bad ki dkhot ka seng na Nongpoh Circle ba ki dei ban shim ïa ka jingkitkhlieh kum kita ki nongïalam na ka bynta ban shakri ïa ki paradoh ki parasnam bad kum ki nongïalam ki hap ban don kata ka jingiohjngai kumno ban ïada kyrpang ïa ka jaid byrneiw khnang ba ka jaid bynriew jongngi kan dang khlaiñ bad dang teh song na ka bynta ka jingkirew shaphrang jong ka jaid bynriew.
