Khliehriat Rymphang 17: Ka Hynñiewtrep Youth Council East Jaiñtia Hills District, ka ai ka jingkyrshan ba pura ïa ka dorabar shnong Nongsning bad ka dorbar shnong Umrasong kiba pyrshah jur ïa ka karkhana saiñ dewïong lane ka karkhana coke, ka M/S Prisidium Brez, coke Factory kaba don hajan shnong kiba ktah jur ïa ki shnong ki thaw.
“Na ka liang ka seng ngi Pyrshah jur ïa ka jingtei ïa ka M/S Prisidium Brez, Coke Factory, namar ki nongshong shnong jong kitei ki shnong kiba don hajan katei ka karkhana ki la mad iaki jingeh bad jingshahktah ha ka jingpyntrei ïa katei ka karkhana kaba watla kam pat dep shna lane sdang ban pyntrei kam pura, ka jingtei ïa katei ka karkhana ka la ktah jur ïa ki tyllong um kiba don hajan kiba ki nongshong shnong ki ju pyndonkam um man la ka sngi na ki tyllong um” ong u kyrwoh na u President HYC East Jaiñtia Hills District, u bah Presios Pale.
Ka seng ka pyrkhat ruh ba watla katei ka karkhana kam pat treikam pura hynrei kala sdang ban wanrah jingeh ïa ki paidbah nongshong shnong, ynda ka la treikam pura bha ka seng kam lah shuh ban mutdur shuh ba sa katno kan pynjakhlia ïa ki um ki wah bad kan pynjakhlia wat ïa ka lyer ba ring mynsiem.
“Kaba kham lyngngoh ka long ba nalor na kitei ki shnong ki la ieng pyrshah bad phah ka shithi jingujor sha u Deputy Commissioner ka East Jaiñtia Hills District bad ruh sha kiwei kiwei ki tnad jong ka sorkar kiba dei peit ïa kane ka bynta naduh u snem 2022, hynrei ka M/S Prisidium Brez ka dang ioh ïa ka Granted Consent to Establish (CTE) clearance na ka tnat Meghalaya State Pollution Control Board ban treikam ha u snem 2023 bad kaba pynsngewsih shuh shuh ïa ngi ki paidbah ka long ba ka sorkar ruh ka kham phai khmat bad kyrshan ïa kum kine ki Kharkhana kiba wanrah ïa ki jingduhnong ïa u paidbah khlem pyrkhar ïa ka khuid ka suba bad khlem pyrkhat ïa ka jingshah ktah ka mariang, ki lum ki wah bad ki tyllong um bam um dih”.
“Ngi kyntu bad ngi dawa ba ka Sorkar, khamtam eh ki ar ngut ki MLA kiba dei ki nongmihkhmat na ka thaiñ ba kin sngap ïa ka sur jong ki nongshong shnong jongka Nongsning bad ka Umrasong bad ngi dawa ruh ba dei ban khang khyrdep noh shi syndon ïa katei ka kharkhana.Ngi dawa ruh ba ka Sorkar bad ki tnad treikam jongka kum MSPCB bad kiwei kiwei ki tnat ba dei peit ba ki dei ban phai khmat sha ka ban pyneh pynsah ïa ka Mariang”
Ha kajuh ka por ka seng ka kyntu jur ïa ka Sorkar ban pyrkhat bha ban nym ai clearance ïa kum kine ki kharkhana kiba ktah ïa ka mariang bad ïa ka imlang sahlang nangne shakhmat, kumjuh ruh ki ïa ki Dorbar shnong bad ki Rangbah shnong jong ki shnong bapher bapher hapoh ka District ban pyndonkam hok da ka jingkitkhlieh ïa ka bor ba la pynkup ha ki ba ym dei ban ai NOC ïa kum kine ki Kharkhana kiba wanrah jingduhnong ïa ka imlang sahlang bad iaka Jaitbynriew hi baroh kawei.
“Ka lawei bad ka pateng jong ka thaiñ bad ka jaidbynriew, ka shongsuk shong shngaiñ jong ki pateng ki ban wan ka shong ha ka jingkitkhlieh ka jong ngi ba mynta ban pyn neh pynsah ban ri ban ïada ïa ka Mei-ramew” pynkut u kyrwoh.
