Hato ka jingïatylli bad jinglong kawei ha ka imlang sahlang jong ngi ka jngai

Haba ngi phai sha ka mynnor ne history ka imlang sahlang ha ka Jaidbynriew jong ngi, ngi sakhi ïa ka jingshah tynjuh jong ka jinglong kawei ne jingïatylli para ma ngi. Ki don bun ki daw ba ka jinglong kawei kam urlong pura naduh ka mynnor haduh kine ki sngi.
Haba phaidien ïa ki por ka jingsynshar ka sorkar phareng ïa ka ri India bad kine ki rilum baieit bathiang jong ngi, ngi ïohi ba kumno ka jingïakhun pyrshah ïa ki bor ki phareng kam don satia ka jinglong kawei da ki khlieh nongsynshar jong ki hima bapher bapher. Ka jingpyrkhat ba lyngkot jingmut khlem da ïohi jngai ïa ka lashai, ka pynlong ba ki khlieh nongsynshar jong katto katne ki hima ki iaid ha la ka jong ka jingsngewthuh. Kane ka aibor ïa ka sorkar phareng ban ïoh kabu ban ïoh ïa ka bor synshar ba pura ha kine ki lum jong ngi.
Kane ka jingbym lah ban don ka jingïalong kawei naduh ka mynnor ka hiar pateng haduh kine ki sngi naduh ki longïing longsem, ki kynhun bapher bapher bad ha ka Jaidbynriew baroh kawei.
Katba ki sngi bad por ki nangïaid ka jingïapait ïapra ka la nangkiew bad ïoh jaka bad ym i don jingkyrmen satia ba ka jinglong kawei ne jingïatylli kan urlong.
Ka jingkylli ka long balei kane ka jia? Hato ka dei ka ha-nga-mei, kwah burom, bieij sbai rupa, thut shen, kwah pynsngewbha ïa kiwei ym ïa ki jong la jong, kwah long nongïalam palat, sngewpher thaiñ ne ktien bad kiwei kiwei ki daw.
Lada kine kiei kiei ki shongkulai sah ha ka pyrkhat pyrdaiñ jong ngi, ka buh jingma kylla ïa ka jingshngaiñ ka lashai ki khun ki kti, ki para ki pyrsa jong ngi.
Ban weng ïa ki mawjynthut jong ka jingïatylli bad jinglong kawei ka jong ngi kum ka Jaidbynriew ka dei sa tang ka sneng ka kraw ka ban sdang na ki rympei ïing ban kiar na ki daw jong ka jingïapait ïapra baroh.
Ka jingpynmih ïa ki khubor ba ktah ïa ka jingtehsong ka jinglong kawei ka jaidbynriew da ki katto katne kiba kam ïa lade kum ki nongïalam jong ki kynhun bapher bapher kim dei ban ïoh jaka ne rung ha ka pyrkhat pyrdaiñ jong ngi kum ka Jaidbynriew, lada ngi sngewthuh ba ngim dei ban ïalehkai ïa ka jingshngaiñ ka Jaidbynriew.
Haba ngi peit bad bishar ïa ki dak ki shin kiba bun, ngi i duh jingkyrmen ba ka jingïatylli kan urlong. Kan long ka jingtim ïa ki pateng ban wan lada ngi dang ïa pyrkhat tang ïa ka myntoi shimet kaba tang shipor bad pynksan jubor ïa la ka jong ka jong ka nia ne jingsngew.
Ngi kyrmen ba hapdeng ki jingduh jingkyrmen , ngin kyndit bynriew ba ka jingïatylli kum ka Jaidbynriew kan wandur ne urlong, khnang ba ngin nym long ki nongtong um ne nongthoh dieng jong kiwei ki Jaidbynriew kumba la maham da u Myllung Soso Tham kum ka jingsneng.
Lada kat haduh kane ka khyllipmat ngim pat kyndit bynriew, lano pat ngin kyndit bynriew? Ki kyntien kiba mih na kita, kiba ngi ñiew ïa ki kum ki nongïalam ha ki kynhun bapher bapher kin long ki mawlynnai ban pynurlong ïa ka jinglong kawei ka imlang sahlang ha ka Jaidbynriew jong ngi.