Dang ïakhun ka sorkar ban pynrung ïa ki jingkieng jri ha ka thup UNESCO
Thoh u CM sha u PM bad sha ki Myntri ka Sorkar Pdeng

Shillong, K’Lyngkot 12 : Ka Meghalaya mynta ka dang ïakhun tyngeh mynta khnang ba ki jingkieng jri kiba don ha ka jylla kin ïoh ban rung ha ka thup jong ka UNESCO World Heritage Site, kaba dei ka jingithuh kaba la niew ba ka long kaba kham phylla ha ka pyrthei baroh kawei.
“Kumba phi tip na kawei kawei ka Ri tang kawei ka jingtyrwa ki ju pdiang ha ka shisnem kumta kam dei satia kaba lah ban tyrwa na bynta san ne hynriew tylli ki jaka. Kumta ka dei kaba eh bha hynrei ngi la thoh sha u Myntri Rangbahduh ka Ri bad ruh sha u Myntri ka tnad Arts & Culture ka sorkar pdeng bad ruh sha ki tnad ba dei peit ban pdiang bad phah ïa ki jingkieng jri ban ïoh ïa ka jingithuh ha ka UNESCO World Heritage Site,” ong u Myntri Rangbah haba kren bad ki lad pathai khubor ha ka jingleit jurip ïa ka jingkieng Jri kaba don ha ka shnong Siej.
Nangta u ong ruh ba watla na ka sorkar jylla ki la pyrshang tyngeh hynrei ka bor pat ka shong ha ka sorkar pdeng. Watla katta ruh u ong ba ki don ka jingkyrmen namar ki ngeit skhem ka ka Jingkieng Jri ka dei hok ban ïoh ïa kane ka nam.
Haba jubab halor ka jingkylli, u Myntri Rangbah u la ïathuh ba um pat ju ïohsngew ne ïoh jingtip ba kin don ki jingkieng jri ha kiwei pat ki ri ka pyrthei.
“Kine ki jingkieng jri ki long kyrpang ïa kane ka thaiñ naba ngam pat ju ïoh sngew ba kin don ha kiwei pat ki bynta jong ka pyrthei kumba ki don ha ka jylla,” u la bynrap biang.
Dang ha ka step sngi Saitjaiñ u Myntri Rangbah ka Jylla ryngkat ka kynhun Myntri ki la hiar lang khrui sha ka shnong Siej, ka shnong kaba don ïa ka jingkieng jri kaba la thaiñ bad pynwan dur kham phylla kum ka jingkieng suin.
Kane ka jingleit jurip kadei hadien shisngi ba ka sorkar ka la pynlong ïa ka jingïalang ba nyngkong eh jong ka Kynhun Myntri ha Sohra kaba la long ha kane ka sngi Thohdieng.
Ïa kane ka jingkieng suiñ kaba dang bteng ban thaiñ bad shna haduh mynta la pynwandur da u Bah Hally War, 68 snem hadien ba u la dep ban pynwandur shwa ïa ka jingkieng jri kaba nyngkong hangtei hi kaba la pynpur na shilliang sha shilliang ka wah ïa kaba la tip mynta kum ka Umkar Living Root Bridge.
Ha ka jingïakren bad u Myntri Rangbah, u Bah Hally War ba dei ruh u Rangbah Shnong bad kumjuh u Sordar ka Elaka Nongkroh Bah Macdonald Khyllep, u Bah Hally u la ïathuh ba ïa katei ka jingkieng jri u la sdang ban pynwandur bad thaiñ naduh ka por ba u dang don 10 snem mynshwa bad mynta ka la iaid kumba 50 snem ei ei.
Haba ïadei bad katei ka jingkieng suin pat u la ïathuh ba kane kan shim por sa kumba 10 – 12 snem ei ei haduh ba kin da lah ban pynkhlaiñ bha pura kumba long lem kiwei kiwei ki jingkieng jri.
Haba jubab halor ka jingkylli jong u Myntri Rangbah, u Bah Hally uba la bat ruh kum u Rangbah Shnong la kumba 40 snem ei ei, u la ïathuh ba ka jingsdang jong u ban thaiñ ïa ka jingkieng jri ka dei malu mala ha ka por ba u dang dap 10 snem ei ei hadien ba u ïohi ba ki paidbah ki shem shitom bha ban kam na shilliang sha shilliang ka wah ha ka por lyiur ba heh um.”
Haba kren bad ki lad pathai khubor hadien ba la mih na kane ka jaka, u Myntri Rangbah u la ai ka burom ïa utei u rangbah uba la aiti lut met bad mynsiem bad pyndonkam hok ïa ka jingstad tynrai na ka bynta ban shna bad pynwandur ïa katei ka jingkieng suiñ.