Ka Congress ka kloi ban pdiang sngewbha ïa u Bah Charles ban ïasoh bad ka party, ong ka Congress

Shillong, K’ Lyngkot 12: U Nongïalam ka seng Congress u Bah Vincent H Pala ha ka sngi Saitjaiñ u la ong ba ka party ka kloi ban pdiang sngewbha ha kano kano ka por ïa u nongïalam barim bad uba mynta u dei u state president ka AITC u Bah Charles Pyngrope ban pynïasoh biang sha ka party.
“U Bah Charles u dei u nongïalam. U la don bad ka Congress. U dei u briew uba donkam bha bad kumjuh ruh ryngkat ki nongkyrshan jong u ki long kiba kongsan. Lada phi ïoh ïa ki nongkyrshan, bad lada ngi buh kum ïa u kyrtong ngi don ïa ka lad. Ha kaba sdang ki nongkyrshan jong u ki la dep ban wan pynïasoh bad ngi bad hadien pat ngi kloi ban pdiang sngewbha sa ïa u ban pynïasoh biang bad ngi,” ong u Bah Pala haba kren sha ki lad pathai khubor.
“Bad lada un ym pynïasoh bad ngi ruh, ki nongkyrshan jong u pat ki la ïasoh bad ngi, ki nongkyrshan jong u hi kin ai ïa ngi kaba bha tam kumba la long u Bah Charles ne kin lah ban long kiba khambha shuh shuh ban ïa u Bah Charles, phin ym lah ban tip ïa kane,” u la ong da kaba bynrap, “Namar kata nga sngewskhem ba ha Nongthymmai kumjuh, u Bah Charles ha kawei ka sngi un sa pynïasoh bad ngi ne ngam lah ban ong namar kane kadei ka jingjied ka jong u hynrei ngi sngew ieid pat ïa u ban pynïasoh namar kum ka Congress, ngi kloi ban pdiang ïa baroh, bad ngim don kano kano ka jingkwah myntoi shimet.”
Haba kylli u Bah Pala u la ong, “Kumba ka long mynta, ngam tharai ba ka jinglong jingman ka dawa ban ngin don ka jingïakren, hynrei ha ka jingïadei shimet, nga ju leit ban jngoh ïa u Bah Charles bad nga ju shongkai ban ïadih sha bad coffee bad u bad nga ju ong ïa u barabor ba un sngewbha ban wanphai biang bad ngi hynrei u la ong ba ka por kan sa batai ha kawei ka sngi kumta phi hap ban ap. Nga ju ïakynduh ruh ïa kiba bun ki nongïalam, hynrei ka jingïakynduh jong nga bad u Bah Charles, ym lah ban len ïa ka jingshisha ba kane kadei ka jingleit jngoh kaba shimet jong nga.”