Da u pud yn buh ka sorkar ban khanglad pynher kali ha ki surok : Bah Sniawbhalang Dhar

Shillong, Lber 24 : U Symbud Myntri Rangbah ka Jylla ba peit ïa ka tnad Transport, Bah Sniawbhalang Dhar ha ka sngi Nyngkong u la pyntip ba shen ka sorkar jylla kan sa wanrah ïa ka jingpynbna ban buh kyndon ïaka jingpynher kali ha kylleng ki surok khnang ban ïada ïa ka jingim briew, ban pynduna ïa ki jingtakhuh kali bad ruh ban don ka jingshngain na bynta kiba pyndonkam ïa ka surok ha ka leit ka wan.
Na ka liang u Symbud Myntri Rangbah haba kren bad ki lad pathai khubor u la ïathuh ba ïa kane ka rai halor ka jingshngain ha ki lynti syngkien ki la shim ha ka jingïalang kaba ki shong ha kane ka sngi bad ki tnad bapher bapher jongka sorkar jylla.
“Ngi dang pynkhreh ïa kane bad hapoh ar haduh lai bnai ngin sa lah ban walam bad ka jingpynbna ban tehlakam ïa ka jingpynher kali ha kylleng ki surok la ka long ha ki surok bah National Highway bad kumjuh ha sor,” u la ong.
Ha kajuh ka por u la ong ba ki la kyntu ruh ïa ki pulit ba kin pyrshang khanglad ïa ka jingpynher stet ha ki surok.
Nalorkata, u Symbud Myntri Rangbah u la pyntip ruh ba la bthah ruh ïa ki tnad ba kin shim ïa ki sienjam ban khanglad ïa ki jingjia aksiden ha kito ki jaka ba la buh bad kdew.
“Ki don ki jaka ba ki jingjïa aksiden ki jia khah khah bha bad halor kane ngi la bthah ba dei ban shimkhia bad ban pyntikna ban pynduna ïa ka jingdon ki jingjia takhuh kali nangne shakhmat,” u la bynrap biang.
U Symbud Myntri Rangbah u la pyntip ruh ba kane ka jingteh kyndon kan dei lang ïa baroh ki kali la ka long naduh ki kali arshaka haduh ki kali saw shaka ruh kumjuh.