Pan jingshai u Justice (Retd) Katakey halor ka kaiphod jurip na suiñ ïa u dewïong ha ki saw distrik

Shillong, Lber 24 : U Justice (retd) BP Katakey uba khlieh ïa ka komiti ba la thung da ka Meghalaya High Court ha ka sngi Nyngkong u la pan jingshai halor ka kaiphod jong ka jingjurip na suin kaba la leh hapoh shi kilomitar sawdong (one KM radius) ïa ki jaka buh dewïong ba la lap ha ki saw tylli ki District jong ka East Jaintia Hills, West Khasi Hills, South West Khasi Hills bad ha South Garo Hills.
Haba kren sha ki lad pathai khubor, u Justice Katakey u la ong ba ïa kine ki ar tylli ki mat la shim bad ïa kren ha ka jingïalang kaba long ha kane ka sngi Nyngkong.
“Ngi la dep bthah ïa ka sorkar ban pynlong ïa ka jingjurip na suiñ hapoh shi kilomitar sawdong jong kito ki jaka buh dewïong ba la lap (ha ki saw tylli ki district). Ka sorkar ha u snem 2019 ka la ai ïa ka affidavit ha Supreme Court kaba kdew ïa ki jaka ba buh dewïong. Kumta halor kane, ngi la bthah ban pynlong ïa ka jingsorbe,” u la ong.
La ïathuh ruh ba ka kaiphod (halor ka jingjurip na suiñ) la ai ha ka 19 tarik u Lber bad ïa kane la ïa kren ha kan jingïalang mynta ka sngi hynrei nga kwah ïa ka jingpynshai kaba shai bad kumta nga la bthah ïa ki ban ai ïa kito ki jingpynshai kiba nga khkmih lynti ba ngan sa ïoh lashai ka sngi,” la bynrap biang u Katakey.
Halor ka jingujor ba la mudui da ki saw ngut ki riew shimet pyrshah ïa ka jingtih dewïong beain ha South Garo Hills, u Katakey u la ong ba ïa ka kaiphod tohkit halor katei ka kam la aiti sha u da ka komiti kaba la khlieh da u Naba Bhattacharjee.
“Namarba ka don ka jingtohkit kaba kham bniah ba hap ban pynlong, ka sorkar ka la bthah ïa u Deputy Commissioner jong ka South Garo Hills ban jurip markhmat bad ban aiti ïa ka kaiphod hapoh shi taiew. Kumta, kata ka kaiphod ngi khmih lynti hadien shi taiew,” u la bynrap.
Halor ka jingsdang ban tih dewïong da ka science ha Meghalaya, u Katakey u la ong, “Ka hap ban don ka bor ban peit ïa ka.”
Haba kren pat halor ka jingsdang ïa ka jingtih dewïong da ka juk ki kor ki bor ne ka scientific mining, u Katakey u la ong, “Ka hap ban don ka bor ban peit ïa ka.”
U la ïai ban ba uno uno u dewïong ba la lap shabar jong ki jaka buh (centralised depot) ba la thaw da ka Coal India Limited (CIL) ki dei kiba be-aiñ ha ka jylla Meghalaya.
“Namarkata, uno uno u dewïong uba la lap lait na ka jaka buh dewïong ba la buh kyrpang u dei u dewïong be-aiñ bad kumta, ka dei ka kamram jong ka sorkar ban leh katkum ka aiñ MMDR.”