Ym lah ban pyndait kyrteng ha ki kali sorkar khlem da ïohbor maham tyngeh ka tnad Transport

By Mawphor Editor On Jun 8, 2026

Shillong, Jylliew 7 : Ka Sorkar Jylla ka la pyrrkhing ïa ki Aiñ ba khmih ïa ka jingpyndait ïa ki kyrtengt ha ki kali sorkar ne ki ‘Name Plate’ ha ki kali Sorkar, kaba pyrkhing ban pyndonkam thik tang ïa ki Heh ki haiñ, ki Nongmihkhmat paidbah, ki Judge, bad ki Ophisar Sorkar haba maham pat ban pyndait khlem da ïoh jingbit na ka Sorkar.
Ka Tnad Transport ka la pynlait ïa ka kyrteng jong ki briew kiba lah ban pyndait ïa ki Kyrteng ha ki kali kat kum ka Motor Vehicle Regulation, 2026, bad batai ruh ha kano ka rukom yn pyndonkam ïa kine ki Kyrteng.
Kane ka jingpyrkhing ka la treikam naduh ka jingpynmih ïa ka jingpynbna ha ka 1 tarik Jylliew. La ong ba hapoh ka jingpynbna, ym dei ban don ki kali ba pyndait ‘Name Plate” ba don ïa ki kyrteng jong ki Tnad Treikam lane ki kyrdan jong ki Heh Ophisar khlem da ïoh jingbit na ka Sorkar lyngba ka Tnad Transport.
Kane ka jingpyrkhing ka shah ïa ki briew kiba bat ïa ka bor kat kum ka Riti Synshar bad ki Nongshakri paidbah ba kynthup ïa u Lat ka Jylla, u Myntri Rangbah, Symbud Myntri Rangbah, ki Myntri Sorkar, Speaker bad Deputy Speaker, Member of Parliament, dkhot ka Legislative Assembly (MLA), ki Chief Executive Member ki Autonomous District Council (ADC), ki Judge ka High Court bad Subodinate Court, u Chief Secretary, Director General of Police, Deputy Commissioner, Superintendent of Police bad kiwei ki Heh Ophisar ba la heh kyrdan.
ïa kane ka jingpynbna la pynmih da ka jingthmu ban khanglad ïa ka jingpyndonkam bakla. Ka jingpynbna ka ong ruh ba ïa ki ‘Name Plate” dei ban weng lane ban tap noh haba kine ki Heh ki Haiñ ne Ophisar kim don satia hapoh ka kali.
Kane ka Rule ka treikam ruh sha ki Chairperson bad Dkhot jong ki bor treikam ba ithuh da ka Riti Synshar ka Ri bad ka aiñ, bad kumjuh ruh kum u Vice-Chancellor, Pro Vice-Chancellor bad Registrar ka Central bad State Government Universities.
Ki Heh Ophisar ki ong ba kine ki jingpyrkhing ki thmu ban wanrah ïa ka jinglong kawei ha ka rukom pyni ïa ka kyrdan jong ki Heh ki Haiñ bad khanglad ïa ka jingpyndonkam khlem ka jingbit ïa ki kyrdan ba ai ka Sorkar.
Kaba kongsan, ka Sorkar ka la pynshai ba kane ka jingpynbna kam shym la ai ïa kano kano ka hok ban tah ïit ïong, pyndait beacon ne red light khlem ki jingthaba. Kum ïa kane ka hok, lada don, kan ïai bteng ban hap hapoh ka jingkhmih jong kiwei pat ki rule bad jingpynbna ba la pynmih da ka Tnad kam Pohïing.