Da pynpra ka Assam balei ka sorkar M’laya ka sngapjar, pynthikna ka suk ka saiñ ki paidbah ha khappud dawa ka HYC

Nongpoh, Rymphang 23: Ka seng Hynñiewtrep Youth Council (HYC) Ri-Bhoi District mynta ka sngi kala ther tyngeh ïaka sorkar Meghalaya bad kumjuh ruh ka sorkar Assam halor ka jingshah pyndik jong ki paidbah ba shong ba sah haka thaiñ khappud Block II naka por shaka por kiba hap ban im hapdeng ka jingsyier bad ka jingrit mynsiem, watla kitei ki 2 jylla ki dang don hapdeng ka lynti ban pynbeit noh ïa u pud u sam ba thikna.
Naka liang ka seng HYC kum ka jingpynrem ïaka sorkar Meghalaya bad Assam mynta ka sngi kala pynlong da ka jingïaid paidbah naduh Umlyngkdait haduh Nongpoh ryngkat ki placard ban pynrem jur ïaka mynthi ka sorkar halor ka jingeh jong ki paid khappud kiba ju shah pynthud bad pyndik naka por shaka por haki pulit ka Assam.
Hadien ka jingïaid paidbah naka liang ka seng kala pynlong ruh ka jingïalang ba lyngkot hakhmat ka Nongpoh Town Shopping Complex ba kum ki nongïalam ka seng naduh u Samla Enlang Sawian Education Secretary ka Sengkmie, Samla Hercules Suting President ka HYC Ri-Bhoi District, Samla Tony Shylla General Secretary, u Samla Jackson Sohtun President ka MPUF Ri-Bhoi District kila ai ka jingkren ban pynpaw ka jingsngewkhia bad pynrem jur halor ka jingmutlop jong ka sorkar ban peit bad khmih ïaka jingeh ki paidbah ha khappud.
Kum ban shu pynpaw hangne ba naka liang ki pulit ka Assam dang ha kine ki khyndiat sngi kila leit ban thwet biang ïa 4 ngut ki briew naka shnong Jatalong bala kynnoh pynpra ïa u mawnongrim bala tei da ka Assam, katba ka sorkar Meghalaya kam nud ang eiei lada wan pynpra ka Assam khamtam ïaka skul SSA kaba la shah pynpra naduh u snem 2018 haka shnong Khlieh Umwang hynrei haduh mynta ym shym la lah shuh ban shna.
Kitei ki nongïalam seng kila ong ruh ba hadien ka jingioh ïakren bad katto katne ki nongïalam naka thaiñ khappud katno ka mynsiem ka dap da ka jingsngewkhia kaba jur ban iohsngew ba kim ioh thiah suk bad im hapdeng ka jingtieng jingsyier naka jingwan pyndik ki pulit Assam naka por shaka por ba haduh mynta ki pulit ka Assam ki dang bteng ban thwet bad ban kem ïaki briew ba kynnoh donkti ban pynpra ïa u mawnongrim ka Assam.
Kitei ki nongïalam kila ther ruh balei ka sorkar Meghalaya ka sngap jar halor ka jingwan pynpra ka sorkar Assam ïaka skul SSA ha Khlieh Umwang, ka jingshah pyndik ka rep ka riang ka kit ka bah ïaki mar rep watla ki nongshong shnong ka Meghalaya kim ju don kano kano ka jingkyntur pud hynrei dei ka Assam kaba ju wan ban mushlia bad kyntur pud naka por shaka por.
Shuh shuh kila ong ruh ba kane ka jingïaid paidbah mynta ka sngi ka dei tang ka jingsdang ba ka sorkar ka dei ban shimkhia ban pynthikna ba ki paidbah ba shong ba sah ha khappud ki dei ban ioh ka jingshngaiñ khamtam ban pynbeit noh mardor ïa u pud u sam, bad lada ka sorkar ka sngap mynthi naka liang ka seng kala pynkhreh ruh da ki jingïakhih ba tyngeh ha nongbah Shillong, kila bynrap.