Ki trai karkhana dewbilat kim ju wan jngoh ïa ka EJHD hynrei ki khmih khmang tang ïa ki mar poh khyndew kiba don hapoh ka district:MJAC

Khliehriat Rymphang 23: Ka Meghalaya Joint Action Committee, ka pynpaw ka jingsngew khia halor ka jingleh ki trai jong ki karkhana dewbilat kiba don ha East Jaiñtia Hills District bad ong ruh ba ki trai kharkhana kim ju kham wan jngoh ïa ka East Jaiñtia Hills District hynrei ki khmih beit khmang tang ïa ki mar poh khyndew kiba don hapoh ka district “Kan sa poi ka por ba ka district kan nym don eiei shuh (Have Not) ha kaba iadei bad ka jingdon ki mar poh khyndew bad ha kaba kum kata ka por, kynmaw ïa ki kyntien jong ngi ba ki trai karkhana kin nym tip bad kim nym ithuh shuh kaei kata ka Shillong khlem da kren shuh ïa ka East Jaiñtia Hills District lei” ong ka MJAC.
Shuh shuh ka Meghalaya Joint Action Committee ba la lam khmat da u General Secretary, u bah Enrico.D.Pasi bad u Chairman, u bah Biangshwa Shylla ki la pynpaw hakhmat u myntri rangbah ka jylla u Conrad Sangma da kaba ong “ Ka jingtan tyllai, lah ma phi ne lah ma nga ka long kaba donkam ba kane ka sorkar jylla kam dei ban shu pynsngewbha ne pynsngewtynnad than tang ïa kita ki karkhana dewbilat kiba don ha East Jaiñtia Hills District bad ki khajna (royalty) dei beit ban lum na kito ki mar poh khyndew ba phah ne khaiï sha ki karkhana bad dei ruh ban don ne buh ïa kita ki khyrdop lum khajna ha ki lynti ban leit sha ki karkhana dewbilat na ka bynta ban lum ïa ki khajna na kito ki trok kiba rung sha ki karkhana, la kumno kumno haduh 800 tylli ki trok kit maw shun bad 130 tylli ki trok kit dewïong kiba ju rung sha ki karkhana man ka sngi kiba pynpoi ïa kitei ki mar poh khyndew sha ki karkhana dewbilat bad ki trok ki ju kit palat pud haduh lai shah na kaba dei ban kit”.
“Kumba ju long, ka sorkar jylla ka ju ai ki jingiarap bapher bapher (subsidies) ïa ki karkhana dewbilat, te ka la dei bha ka por ba mynta ka sorkar ka dei ban pyrkhat ruh na ka bynta ki paidbah ban wanrah ïa ka roi ka kiew, ban buh shwa ïa ka jylla hakhmat eh bad buh noh shwa hadien ïa ki karkhana, lyngba kane yn sa lah ban kyntiew ïa ka jinglong jingman ki briew hapoh ka jylla”
Lada shu buh jingkheiñ lada 25MT u dewïong ha ka shi trok man ka sngi kan long 1,186,250 MT ( Shi million shi spah phra phew hynriew hajar ar spah san phew metric ton) u dewïong ha ka shi snem, kane ka pyni ruh ba ka sorkar jylla bad ka sorkar pdeng ka duhnong haduh katta na ki khajna na u dewïong uba poi sha ki karkhana dewbilat kiba don ha East Jaiñtia Hills District.
Kumjuh ruh ha kaba iadei bad u mawshun uba pynpoi sha ki karkhana dewbilat, lada 30MT u mawshun ha ka shi trok man ka sngi , lada ha ka 365 sngi ka long 8,760,000 MT, (Phra milion hynniew spah hynriew phew hajar Metric Ton) ha ka shi snem, kane ka jingleit u mawshun kaba khlem ka khajna ka wanrah jingduh nong ïa ka sorkar jylla bad ka sorkar pdeng ha kaba iadei bad ka khajna na u maw shun uba na East Jaiñtia Hills District uba pynpoi sha ki karkhana dewbilat kiba don hapoh ka district.
Ka MJAC ka bynrap shuh shuh ba na kitei ki jingiohnong kiba deibhok ban ioh hynrei kiba khlem poi satia sha ka pla tyngka jong ka sorkar, kiba dei ban wan lyngba ki khajna na ki mar poh khyndew, ka lah la kumno kumno ban shna haduh 100 kilo kimtar ka surok kaba bha man la u snem ha East Jaiñtia Hills District kaba long na ka bynta ka jingbit jingbiang ki paidbah.
Ka Committee ka kynthoh jur da kaba ong ba kane ka sorkar pat ka leh matlah bad leh bym salia ha kaba iadei bad ka jingduhnong ka sorkar na u dewïong bad u mawshun ba pynpoi sha ki karkhana dewbilat kiba don ha East Jaiñtia Hills District, lada ka sorkar ka lum ïa ki khajna ka lah ruh ban pyn hiar dor wat ïa ka umphniang petrol bad umphniang Diesel hapoh ka jylla.
Ha kajuh ka por haba ka sorkar ka lah ban ai jingiarap (Subsidies) ïa ki karkhana dewbilat, ka la dei ruh ban ruh ban wanrah ia ki policy ban ïada ïa ki nongkhaiï , ka dei ruh ban don ka jingiateh kular kaba paka ban ailad shwa ïa ki nongkhaiï kiba dei ki trai jylla ba kin khaiï bad pynpoi ïa ki mar poh khyndew sha ki karkhana dewbilat bapher bapher, namar kumba long mynta ki nongkhaiï kiba na bar jylla kum na Punjab, na Jamu and Kashmir bad na kiwei kiwei ki jylla ki iohlad bha pynbab ban khaiï ha ki karkhana dewbilat kiba don ha East Jaiñtia Hills District ha katba ïa ki nongkhaiï kiba napoh ka jylla pat ki buh shwa sha rud bunsien. Ha kajuh ka por ka Meghalaya Joint Action Committee ka kynthoh jur ruh ha ka shithih ujor ba la buh hakhmat u Conrad Sangba halor ka jingduna bha ka jingthep kam ïa ki trai jylla hapoh ki company dewbilat kiba don ha East Jaiñtia Hills District.