Khliehriat, Naiwieng, 26: U Deputy Commissioner jong ka East Jaiñtia Hills District uba dei ruh u Chairman jong ka District Disaster Management Authority (DDMA) u Shivansh Awasthi, u la kyntu bad bthah ïa ki paidbah kiba ñiah kali, ïa ki nongtrei jong ka National Highway Authority of India (NHAI) bad ki bor Pulit khnang ban lait na kano kano ka jingjia ba sngewsih bad ban nym wanrah kano kano ka jingthut ha ka por ba ki nongtrei ka NHAI ki pyntrei ïa ka kam ban maramot bha ïa ka surok bad shna bha ïa ki nala tuid um kiba heh.
Ha ka jingpyllait khubor, u DC u la ong ba ka jingpyntrei ïa ka surok National Highway-6 kaba naduh Lumshnong ter ter shaduh Malidor ka la ïaid shaid shaid mynta, kumta khnang ba ka kam kan kloi ba kan nym don kano kano ka jingthut, ki bor district lyngba u DC ki bthah ïa baroh ki paidbah ba ki dei ban bud ïa ki kyndon aiñ ñiah kali, ban ai ruh ka jing ïatreilang bad ki bor pulit kumjuh ruh bad u Project Director jong ka NHAI.
La bthah ba ki kali rit na ka bynta ki paidbah ki lah ban ïaid na baroh ar liang ka surok katba ki kali heh (HMV) ki dei ban ïaid tang shi laiñ lane ka one way traffic bad la kyntu ruh ba kiba ñiah kali kin ai ka jingïa treilang bad ki bor pulit.
La bthah ruh ïa ki nongtrei jong ka NHAI kiba pyntrei ïa ka surok ba ki dei ban da buh dak ha shi lynter ka jingpyntrei na ka bynta ki ba ñiah kali ha ka por mynmiet kata night visibility khnang ban lait na ki jingma jingmynsaw, ki dei ruh ban buh ki signboard kiba don ki jingmana ha man la ki jaka kiba buh jingma khamtam ha ki jaka ba don ki jingkieng, ki nala tuid um kiba heh (culvert) bad kito ki jaka ba long thliew palat hapdeng surok bad ki jaka ba buh jingma ba ki briew khamtam kiba ñiah kali kin ïohi bad ba kin lait na ki jingma
U la ong, lada ka NHAI ka donkam ban khang ïa ka surok na ka bynta ka jingpyntrei ïa ka surok , dei ban don ka jingïatreilang bad ki nodal officer jong ka tnat pulit bad kane ka project baroh kawei kaba pyntrei ïa ka surok kaba naduh Lumshnong shaduh Malidor ka donkam eh ka jingïatreilang hapdeng u Superintendent of Police ka East Jaiñtia Hills District bad u Project Director ka NHAI khnang ba kan nym don kano kano ka jingjia ba sngewsih bad ba kan pynsuk ruh ïa ki paidbah ba leit ba wan.
