Shillong, Naiwieng 26: Ka khubor ba la ïoh na ki pulit la ong ba hadien ba ki pulit ki la ïoh jingtip ba ha ka 21 tarik mynta u bnai ha ka por kumba 6.35 baje mynmied, ka la don ka jingïashoh kaba la mih hapdeng uwei uba kyrteng u Alamin bad uwei u khynnah ba dang 14 snem ka rta hapoh ka shnong Goladigli (WGH).
Ki la leit bran bran sha katei ka jaka bad ha ka jingtohkit la shem ba ha ka por ba jia kane ka jingïashoh une u Alamin la kynnoh ba u la thombor bad dung ïa utei u khynnah da ka khanshi bad u la phet krad na kane ka jaka.
Ha kane ka jingjia utei u khynnah u la mynsaw jur bad la pynkitnoh sha CHC Phulbari ban ïoh ka jingsumar, hynrei na ka liang u doktor uba don ha katei ka por u la pyntip ba une u khynnah ba la wanrah u la lah khlad lypa. Kham hadien pat ïa ka met utei u khynnah la kitnoh sha Civil Hospital Tura na ka bynta ban pyndep ïa ka Post Mortem examination.
