Shillong, Naiwieng 26: U Symbud Myntri Rangbah ka jylla uba khmih ïa ka tnat ki Kam Pynroi Sor ka sorkar jylla u Bah Sniawbhalang Dhar ha ka sngi baar u la pynthikna ba ka sorkar kan ïada ïa ka bha ka miat jong kiba shongdie jingdie ha madan.
Haba kren sha ki lad pathai khubor u Bah Dhar u la ong, “Kiba die madan ki dei hi ki briew jong ngi hynrei nga kyrpad ïa ki ba kim dei ban long kiba kulmar jingmut, ngin sa pyrkhat, kidei ki briew jong ngi hi, ngin ïa syllok bad ngin pyrshang ban ïada ïa ka bha ka miat jong ki.”
Kane ka jingong jong u ka la wan hadien ba kiba shongdie madan dangshen ki la pynpaw ïa ki jingpyrshah da kaba leit tur sha Shillong Municipal Board ban pyrshah ïa ka jingthmu ban pynkynriah noh ïa ki na Khyndailad bad na ki thaiñ Motphran.
U la ong ba ka sorkar ka la dep ban ithuh ïa ki jaka ban pynkynriah ïa kiba shong die jingdie ha madan.
“Ka kam jong ka jingithuh ïa ki jaka ïa mynta ka dang ïaid,” ong u Bah Dhar.
Katkum ka jingong jong u kane ka kam pynkynriah yn leh lyngba ki kyrdan kyrdan.
Haba kylli lano un sa khot ïa ka jingïalang bad ka town vending committee, u Bah Dhar u la ong, “Ngin sa peit shwa naba mynta ka aïom lehkmen ruh ka la wan, ngin sa ïa peit ïa kane ka kam. Ngim da donkam ban leh kyrkieh.”
“Kumba long mynta ïa ka kam ban pynkynriah, kam mut ba la pynsangeh shipor kin dang shong shwa kumto kumba ju long bad hadien ba la pyndep lut ïa baroh ki kam bad kiba die madan, ngin sa pynïaid shakhmat ïa ka kam,” u la ong.
