Da la ki khmat lap ka Dr. Ampareen bym pat biang ka jingtei ban kyntiew kyrdan ïa ka Khliehriat Civil Hospital

Khliehriat, Nailar, 16: Ka Myntri ka Koit ka Khiah, ka Dr Mazel Ampareen Lyngdoh ha ka sngi Baar ka la hiar jurip ïa ka Khliehriat Civil Hospital bad ïohi da la ki jong ki khmat ba kane ka jingtei ïa kane ka hospital kam pat da biang bha ban kot sha ka kyrdan Civil Gospital, watla ki nongtrei ki la biang hynrei donkam ban don ka jingtei kaba biang lem bad ki kamra kiba bit ba biang.
Ka Myntri ka la ong ba mynshwa kane ka Hospital ka dei tang ka PHC, hadien pat la kyntiew sha ka CHC bad hadien kane la kyntiew kyrdan pat sha ka Civil Hospital bad ong ba kane ka jingkyntiew kyrdan ka dei kaba khlem da don ka jingpynkhreh ne ka plan, watla ïa ki tiar ba don kam ha hospital la sdang ban pynbit pynbiang hynrei ka jinglong jingman jong ka jingtei ïa ka hospital kam pat biang bha, kumta kane ka buh jingeh shisha ïa ki nongtrei naduh ki doctor, ki nurse bad ki nongtrei jong ka hospital.
Ka la kyntu ïa ki paidbah ba kim dei pat ban duh jingkyrmen bad kim dei ruh ban don kano kano ka jingartatien, hynrei ki dei ban don ka jingngeit ba ki doctor ki nurse ki lah ban ai ka jingiarap kaba paka ïa ki paidbah ha kane ka hospital, ka la ai ka jingiaroh ïa ka jingtrei shitom ki doctor, ki nurse bad baroh ki nongtrei jong kane ka hospital wat hapdeng ka jingbym pat bit pat biang bha ka jingtei ïa ka hospital ki lah pat ban trei ïa ki kam na ka bynta ki paidbah bad ka la kular ban shim khia ha kaba ïadei bad jingbit jingbiang jong kane ka Khliehriat Civil Hospital.
Na ka liang ki doctor bad ki nurse jong ka Khliehriat Civil Hospital, ki la pynpaw hakhmat ka Myntri ïa ki jingeh ba ki ju ïakynduh bad la sngewthuh ba ki dang bun shisha ki jingduna ha kane ka hospital, naduh ki jaka thoh slip, ka bym don kano kano ka jingïada kaba paka ïa ki nongtrei bad kumjuh ruh ïa ki paidbah kiba wan, naduh ki jaka shong ki doctor, ki bym bit bym biang bha, kumjuh ruh ki jaka treikam jong ki nurse bad ki jaka ban buh ïa ki tiar ki tar jong ka hospital.
Ka Myntri ka la ong, “ki ar tylli ki tnat kiba treikam bha ha kane ka hospital ki dei ka tnat Gynae, bad ka tnat ba dei peit ïa ki khyllung khynnah. Kine ar tylli ki dei ruh kiba donkam bha hapoh Meghalaya, bad ong ruh ba dei ban pyntikna bha ïa kiba kha khyllung bad ki khyllung ba kin leit phai sha ïing ha ka jinglong jingman ba bit ba biang, ha ka koit ka khiah bad ki Asha ruh ki donkam ban bthah bad bud dien bha ki longkmie”
Ka la kyntu ïa ki doctor rangbah ba kin iarap lem ïa u DM&HO namar tang ma u marwei ka la long ka jingban khia ban trei ïa ka kam, ka la kular ban leh katba lah ban pynwandur ïa kane ka hospital bad ong ba kan sa shong ban ïapyrkhat lang bad u MLA ka thaiñ, kumjuh ruh bad u Symbud Myntri Rangbah ban pynpaw ruh ba ka long kaba la i donkam kyrkieh bah ban tei biang ïa kane ka hospital kaba dei ka PHC kaba rim ban tei pat ha ka rukom kaba biang ba bit.
Halor ka jingbym biang ka um bad kiwei ki bynta, ka Myntri ka la lap ba ka jingpyntrei ka dang ïaid shakmhat bad khmih lynti ba ka kam kan iaid beit.