Kyntu ka JSU ïa ka Dr. Ampareen ban pynïoh ïa ka jingtei kaba biang ha Civil Hospital

Khliehriat, Nailar, 16: Ka Jaiñtia Students Union Khliehriat Circle hapoh ka jingïalam u President, u samla Livingson Dkhar Sama, hynnin ka sngi ki la leit ban jurip lang bad ka myntri ka koit ka khiah ïa ka Khliehriat Civil Hospital bad ka seng ka la kyntu ïa ka myntri ba kan sngewbha ban shim khia lem ban pyn ioh noh kham kloi ïa ka jingtei kaba bit ba biang na ka bynta kane ka hospital khang ba kan nym buh jingeh than ïa ki doctor, ki nurse bad ki nongtrei bad kumjuh ruh ki ba pang ba shitom kiba wan ha kane ka hospital.
U samla Livison Dkhar Sama, u la ong ba ka seng ka la ïaid lynti la slem ha kaba ïadei bad kane ka hospital bad ka seng ka la shim ruh ïa ka rai ba kan ïaid beit shakhmat na ka bynta ka jingbit jingbiang ki paidbah, u la pynkynmaw ruh ba ki dkhot jong ka seng dang myn ha ka 19 tarik u naitung ki la leit ban pyndam noh ïa ka signboard kaba thoh Civil Hospital Khliehriat bad ong ba ka jingtreikam bad ka jingthoh kam pat ïahap satia.
Utei u nongïalam ka JSU, u la ai khublei ïa ka myntri ka koit ka khiah kaba la sngap lem ïa ka sur jong ka seng, kaba la pynpaw bad pynsngew ha ka halor ka jingbym bit bym biang ha hospital ha kiba bun ki liang bad kaba la kloi ruh ban wan da lade ba wan jurip ïa kane ka jaka ai jingsumar ha Khliehriat bad lap ruh ïa shibun ki jingduna.
U la pynpaw ruh ka jingsngew khia halor ka jingbym biang ka jaka ba thoh slip, ka bym don jingïada eiei ia ki nongtrei bad ki nongwan shim slip, kumjuh ruh ka jingbym biang ki kamra kiba biang na ka bynta ki doctor, ki nurse bad ruh ki kamra ba biang ban buh ïa ki tiar ki tar jong ka hospital, namar kumba long mynta kiba bun ki tiar la shu buh pathar shabar ka kamra bad ha ki lynti ïaid (passage), kumta u bah Livingson u la kyntu ïa ka myntri ba kan pynkloi ban pynioh ïa ka iing ne ka jingtei kaba bit ba biang khnang ba kane ka hospital ba kan kan long kaba beit ba ryntih.