Jowai, Nailar, 16: Kum shi bynta ban rakhe ïa ka sngi laitluid kaba 77 jong ka ri India, ka Joint Action Committee School Lumpyngngad (JACSL) Amlarem Sub Division haka 15.08.2023 ka la lehkmen ïa kane ka sngi laitluid ka ri India ne ka ‘Independence Day’ kumba leh lang da kiwei pat ki jaka hapoh ka Ri.
Wat lada ki don sha ki thaiñ border Bangladesh, kham pajih na ka Sub Division bad na District Headquarter ruh, hynrei ki nongïalam shnong kim klet ban rakhe ïa kane ka sngi khraw jong ka Ri, kum shi bynta ban pynsgewthuh paitbah ïa ka jinglong nongshong shnong babha, ban wanrah jingsuk, jingkmen, jingïatylli bad ban pynrung ha ki jingmut jingpyrkhat ki nongshong shnong ban ieit ka Ri bad ka jait bynriew.
Ha kane ka sngi la ïoh ruh ban pynher ïa ka lama lai rong ka Ri India da u kongsan ba shah khot sngewbha u ma Salan Swer uba dei u Range Forest Officer, Pasadwar Range bad kumjuh ruh u la ai jingkren sha ki paitbah ha kaba ïadei bad kane ka sngi.
La wan sakhi ïa Kane ka sngi da ka jingmih paitbah ki nongshong shnong ka Lumpyngngad, ki nongshah khot sngewbha, ki nonghikai, ki khynnah skul bad na ki shnong ba marjan.
La pynphuh pynphieng ïa kane ka sngi da ka jingïa shim bynta ki 4 tylli ki skul ba don hapoh shnong, kita ki long ka Lumpyngngad UPS, Lumpyngngad non govt LPS, Lumpyngngad RCLPS, Lumpyngngad Presbyterian LPS bad kumjuh na ka VO Tur Shaphrang.
Ha kane ka sngi la ïoh ruh ban sakhi ïa ka Match Pass na ki khynnah skul, ki Mass Drill na ka skul LPLPS, LUPS, RCLPS bad ka jingshad group na ka VO Tur Shaphrang.
La ïoh ruh ka jingkren ruh da u Waheh Chnong/Advicer ma C. Talang, na ka Rihok Swer bad la kren ai khublei da ka Liberty Rymbai. Pynkut ka khyrwoh ba la phah da u Chairman ma Johnny Shylla.
