Nongpoh, Nailar 09: Namar ka jingjot rathai jong kawei ka iing skul haka shnong Umjari Mathan ha Ri-Bhoi kaba la shu da bad tap da ki tin kiba la jot bad pei, ka Hynniewtrep Youth Council (HYC), Lai Shnong Unit mynta ka sngi kala leit ban noh synñiang da ki tin sop iing sha katei ka skul.
Ha katei ka sngi ka jingleit aiti ïa kitei ki tin sop iing la don ryngkat ruh da u Bah Lazarus Rani Organising Secretary ka HYC Ri-Bhoi District, u Samla Donbok Maiong President ka HYC Lai Shnong Unit, ki riew rangbah bad ki longkmie na katei ka shnong ryngkat ki bor pynïaid skul.
Katei ka skul ka dei ruh kaba dang don hapdeng shibun ki jingduna bad ki jingdonkam bad naka liang kitei ki nongïalam ka seng kila kular ruh ban shimkhia ban ïakren bad ki bor ba dei peit khamtam ki nongmihkhmat ba ki dei ban phai khmat sha katei ka skul naka bynta ki jingïarap ban kyntiew ïakatei ka skul pule khamtam ka pule ka puthi.
