Da ki surok ba kot 131 klur tam yn tei sha New Shillong ban weng jingkhapngiah

Shillong, K’Lyngkot 24 : Da ka thong ban weng ïa ka jingkhapngiah, ka sorkar jylla ha ka sngi Balang ka la buh mawnongrim na ka bynta ban tei ïa ki lai tylli ki surok ban poi sha New Shillong Township kiba la kot haduh kumba 131 klur tam.
Ïa kine ki mawnongrim la buh da u Myntri Rangbah ka Jylla Conrad K Sangma ryngkat u Symbud Myntri Rangbah, Bah Prestone Tynsong nalor u Deputy CEM ka KHADC Bah PN Syiem, Executive Member ka KHADC Bah Teibor Pathaw nalor ki ophisar ka tnad bad ki nongsynshar shnong ba dei na katei ka thaiñ ha ka jingïalang kaba long ha Vivanta, Shillong.
Kitei ki lai tylli ki suro ki kynthup ïa ka surok na Lumshyiap Bellafonte sha New Shillong Township ha Umsawli lyngba ka Mawpat ha ka jingmang pisa kaba 49 klur tyngka. Kawei pat ka surok ka dei na Bribah sha IAS Colony New Shillong Township ha ka jingmang pisa kaba 27.49 klur tyngka bad kawei pat kadei ka surok na Diengpasoh sha Shillong Byepass ha ka jingmang pisa kaba 55 klur tyngka.
La ïathuh ruh ba kane ka jingbuh mawnongrim ka kynthup ruh ïa ka jingpynbha bad pynheh ïa ka surok Shillong-Diengpasoh sha ka 2-Lane, kaba long naduh 14Km sha ka 21.20 Km.
Na ka liang u Myntri Rangbah haba kren ha kane ka sngi u la ong ba ka jingeh halor ka jingkhapngiah, ka jingdheng kali bad ka jingnang roi jong ka Nongbah Shillong ha ki snem bala leit noh ka dei kaba la neh slem bha.
“Kane kam dei eh tang shaphang ka New Shillong kaba donkam ban pynbha hynrei ngi donkam ruh ban peit ba kane ka nongbah Shillong ba mynta kan bha lang katba ka jingpyntrei na ka bynta Shillong ba thymmai pajih na kane kaba mynta. Kumta ka jingkhapngiah kan ailad ïangi ban ym don tang ki jingtei kiba thymmai hynrei ruh ban kyntiew ïa ka nongbah Shillong,” ong u Myntri Rangbah.
Nalorkata u ong ruh ba ki surok kiba ka sorkar kan shna mynta kin ïalam beit beit sha ka pdeng jong ki jaka treikam ba thymmai jong ka sorkar ha New Shillong. Kumta ban lait na ka jingdheng kali ban poi sha ka Secretariat thymmai la pynsuk da kaba wanrah ïa kitei ki surok ba thymmai.
“Ngi khmih lynti ba la kumno kumno ha u Risaw mynta u snem ngin ïoh ban sdang pyntrei noh ïa ka Secretariat ba thymmai bad ngi kyrmen ba hapoh lai snem ngi lah ban pyndep ïa kiba bun ki kam. Nga kyrmen ruh ba la kumno kumno 30 haduh 40 persen ka dheng kali yn lah ban weng noh hadien ba la pynkynriah noh ïa Iing Dorbar Thawain ka jylla bad kumjuh ïa ki ophis treikam ka sorkar sha New Shillong Township. Kane kan pynduna wat ïa ka jingkhapngiah bad ka dheng kali ha nongbah Shillong. Kane kadei ka jingpyrkhat jngai kaba ngi don kum ka sorkar namar kine ki lai tylli ki surok kidei kiba kongsan bha bad ka jingpyntrei ïa ki ruh kan sted bha,” ula bynrap shuh shuh.
Na ka liang u Symbud Myntri Rangbah, Bah Prestone u la kyntu ïa ki nongïalam shnong ban ïatrei lang bad ka sorkar na ka bynta ban lah pyntreikam pura ïa katei ka projek. “Ngi thrang ban lah pyntreikam pura ïa kane ka projek bad kumta nga kyntu ïa ki nongsynshar shnong ba kin ïa trei ryngkat ryngkat bad ka sorkar bad lada ki donkam kano kano ka jingïarap na ka sorkar ruh ka long kaba kloi khnang ba ngin lah ban pynwandur khambha ïa ki shnong ki thaw.”
U Secretary ka tnad Urban Affairs, Bah E Kharmalki u la ong ba ka daw jong ka jingkhapngiah kadei eh namar ki surok ba mynta ha nongbah Shillong ki dei ba ym lah shuh ban pynheh. Kawei ruh ba ka jingbym don ki jaka pynieng kali ka la pynlong ïa ki surok ïaid kali ban kylla long ki jaka pynieng kali.
Kawei pat u ong ba kadei ka jingbun palat ki briew kiba thied kali thymmai bad khamtam ba ki briew ki kham lah ban leit da ki kali lajong ban ïa kaba leit da ki kali kamai.