Shillong, K’lyngkot 24 : Ka North Eastern Indira Gandhi Regional Institute of Health & Medical Sciences (NEIGRIHMS) sa shisien ka la buh ïalade ha ka jingshah peitkhmat halor ka jingkynnoh kheiñ sting shaba palat liam jong ki doktor kaba lam sha ka jingiap jong iwei i nongpang ba 23 snem ka rta hapoh ka Hospital hynnin ka 23 tarik Kyllalyngkot khlem ka jingtip ïa ka daw.
Ki bahaiing hasem ki la kynnoh da ka jingbitar ïa ka jingleh ki bor pynïaid ka Hospital, haba pyntip ba ki doktor ki la leh Operation ïa ine i nongpang khlem da ïoh jingbit ne pyntip sha ki halor ka jingpang ba i don. Kat kum ka jingong ki bahaïing, ki bor pynïaid ka NEIGRIHMS ki la leh ïa ka operation da kaba aidaw ba don jingthut ha ki snier jong ine i nongpang.
Hadien kane, ïa ine i nongpang la rah noh wut wut sha kamra ICU khlem ka jingtip jong ki bahaïing hasem. Ki la kam ba kim shym la ïakynduh satia ïa ki doktor naduh ka 17 tarik Kyllalyngkot tad haduh ka 22 tarik Kyllalyngkot. Hynrei, ha ka 23 tarik Kyllalyngkot ha ka por 9 baje mynmiet, ki bor pynïaid ka Hospital kila pynbna ba ine i nongpang ula khlad noh.
Ki bahaïing kila kynnoh ïa ki nongtrei jong ka hospital ba kim shym la pynsngap ïa i nongpang watla ine i samla ba 23 snem ila ud ba im lah ban ring mynsiem bha. Ki la ïathuh ba ine i nongpang ila thoh ruh ïa ka shithi shuwa ba in khlad noh, ba batai ïa ka jingkheiñ sting jong ki nongtrei ka Hospital bad ki bor khmih hapoh ka ICU.
Ki bahaïing ki la kynnoh ba wat hadien kane ka jingpynbna ba ila khlad noh, ki bor ka hospital ki la aiti tang ïa ka death certificate khlem da ai ïa kiwei kiwei ki kot ki sla ba donkam ban tip pat ïa ki daw jong ka jingiap.
Ki bahaïing hasem kiba la bitar lep ïa kane ka jingjia, kila pyrshang ban leit ïakynduh ïa ki heh jong ka Hospital ban pan jingpynshai hynrei kila shah khang lynti pynban ha ki nongap pahara jong ka Hospital.
