Mynjur ka Kynhun Myntri ïa ka rta ba rit bad ba heh duh ban thung kam ha ki 4 tylli ki tnad

Shillong, K’lyngkot 24 : Ka kynhun Myntri ha ka sngi Balang ka la mynjur ïa ka rta kaba rit eh (minimum) bad ba heh duh (maximum) ha ka jingthung kam ha ki saw tylli ki tnad Sorkar- ka Civil Defence and Home Guards, Excise, Registration, Taxation and Stamps (ERTS), Forest and Environment bad ka tnad Home (Police) jong ka Sorkar Jylla.
Haba ïakren bad ki nongthoh khubor, u Myntri bad nongpathai khubor ka Sorkar u Bah Paul Lyngdoh ula ong ba namar ka jingdawa ka kam ïa ka bor met, ka rta ba duna eh la buh ha la ka jong bad kumjuh ruh ïa ka snem ba heh duh ha ka jingthung kam ha kine ki saw tylli ki tnad.
“Kine ki dei ki rta ba rit eh kaba long hapdeng 18-21 snem shaneng bad ka snem ba hehduh ba la rai da ka Kynhun Myntri mynta ka sngi la buh ban long naduh 27 snem na ka bynta ka tnad ERTS, haduh 32 snem ha ka Tnad Civil Defence and Home Guard, sha ka 30-32 snem ha ka Forest & Environment bad 21 snem kum ka snem ba rit eh bad 27 snem kaba heh duh na ka bynta ka tnad kam Pohïing ne thung kam pulit ” ula ong.
U Myntri ula ong “Katba nga dang pyrshang ban batai sha phi, kine ki kynthup ïa ki kam kum ka junior scale MPS bad UB/AB,SI, baroh kine ki kam ki donkam ïa ki briew kiba dang rit ka rta, kumta ka jingrung kam la buh kat kum ka jingdon kam. Kane ka donkam ïa ka jingpynthikna da ka kynhun Myntri, na kata ka daw ngi la wanrah ban ïakren bad la mynjur lang da baroh”.
U Bah Paul ula pynbna ruh ba ka Sorkar Jylla shen kan sa pynbna noh ïa ka khubor laitkam ba palat 3000 tylli ki kam jong ki kyrdan bapher bapher hapoh ka Tnad Home (Police) bad palat 500 tylli ki kam hapoh ka Tnad Civil Defence and Home Guards.
“Ngin dang shimpor sa ar haduh lai taiew ban pynbna ïa kane ka khubor laitkam bad ngi dei ban lah pyndep ïa ka kam hapoh ka arbnai ban wan” ula ong.