Shillong, K’lyngkot 24 : U Myntri bad Nongpathai khubor ka Sorkar u Bah Paul Lyngdoh ha ka sngi Balang, ula ong ba ka Sorkar kam ñiew satia ïa ka kynhun kiengatiar Hynniewtrep National Liberation Council (HNLC) kum ka ‘Nongshun’.
U Bah Paul ula kynthoh ïa kane haba jubab ia ka jingkylli halor ka jingpynkhreh ka Sorkar ïa ki bor pahara na ka bynta ka jingrakhe Republic Day khamtam hadien ka rai ba dang shen jong ka HNLC ban weng noh ïalade na ka jingïakren ïasuk bad ka Sorkar pdeng bad sorkar jylla.
Haba ïakren bad ki nongthoh khubor hadien ka jingïalang jong ka Kynhun Myntri, kaba la ai jingmynjur ïa ki jingkren lamphrang ba la pynkhreh jong ka Republic Day, u Bah Paul ula ong ba ka jingpynkhreh ïa ki bor pahara kan ïaid beit kumba ju leh.
Hynrei ula ong ba ka suk ka saiñ ha Jylla ka dei kaba biang bad kam da donkam satia ban nang shim shuh shuh ïa ki bor pahara na shabar.
U Bah Paul u ïathuh ba u Myntri Rangbah ka Jylla Conrad K Sangma bad u Symbud Myntri Rangbah ba peit ïa ka tnad kam pohïing u Bah Prestone Tynsong kila pynpaw ba ka jingkhang ka dang ïai plie ban ïakren bad ka HNLC haba bynrap “Kane kan sa mih ruh ha ka jingkren ha ka Republic Day”.
Haba kylli, u Myntri ula ong “Ka jinglong jingman ka long kaba suk ba saiñ bad ngim ñiew ïa ka HNLC kum ka Nongshun jong ngi ne ki paidbah ba ngin khuslai na kata ka daw ngi ong ba ka jingkhang ka dang plie bad ïa kane yn sa pynpaw ruh ha ka jingkren Republic Day”.
