Nongpoh, Nailar 17 : Ki nongïalam jong ka RBYF, Lum Umpih Unit hynnin ka sngi kila ioh bat ïa 2 ngut ki bar jylla kiba pynhap khlem akor da ki pylleng pyut ha rud surok Umsning By-Pass kaba hap haka shnong Lum Umpih ha Ri-Bhoi, kaba la wanrah ruh ka jingsma iwtung kaba shyrkhei ha katei ka jaka.
Naka liang u Bah Balakmen Nongbri President ka Umsning Circle, Bah Henry Marngar President ka Lum Umpih Unit kila ïathuh ba ka don kawei ka trok container kaba don ïa u Number UP 21 CN 1156 kaba dang wan na Silchar hynrei haba poi ha katei ka jaka u nongñiah bad nongbud katei ka trok kila shim kabu halor ka jingduna kali bad duna briew namar ka sngi rakhe laitluid ka Ri, kila pynhap da ki pylleng pyut kiba la mih ksaiñ ruh bad kaba la wanrah ka jingsma iwtung kaba shyrkhei.
Naka liang ki dkhot ka seng tang mar sien iohi ïa katei ka trok kaba bret pylleng pyut ha katei ka jaka kila leit mar mar ban bat ïa u nongñiah bad nongbud katei ka trok kiba dang bunkam ban pynhap ïa kitei ki pylleng pyut na katei ka trok harud surok bad naka liang ki dkhot ka seng mardor kila phah tam biang ïa kitei ki pylleng pyut baroh ban thep biang hapoh katei ka trok ryngkat ka jingmaham kaba tyngeh ba kitei ki bar jylla kim dei shuh ban dang mlien nangne shakhmat namar katei ka rud surok bah kam dei ka jaka bret ñiut.
Hakajuh ka por naka liang ka seng kala mahan tyngeh ruh ïa kiwei pat ki riew paidbah ba kim dei ban bret ñiut kat shaba lap ba shem khamtam haki rud surok kaba wanrah ïaka jingijli bad pynsniew dur ïaka mei mariang hynrei ban bret haki jaka ba dei ban bret kumba dang ha kine ki khyndiat sngi naka liang ka seng kala lap ruh ïa kawei ka masi bala bret khlem akor da ki paidbah kaba la pynbitar shikatdei ïaki dkhot ka seng ha katei ka juh ka jaka ha kaba kum ki dkhot ka seng ki hap ban shim ka jingkitkhlieh ban leit tep ïa katei ka masi namar ka jingmih ka sma iwtung kaba shyrkhei bad lada lap nangne shakhmat naka liang ka seng kan sa shim da kiwei pat ki sienjam bad ki jingpynshitom kiba tyngeh, la bynrap ki dkhot ka RBYF.
