Shillong, Lber 05 : Ka North Eastern Indira Gandhi Regional Institute of Health and Medical Sciences (NEIGRIHMS) ha ka 04tarik mynta u bnai ka la rakhe ïa ka lyngkhuh snem ba 13 jong ka da ki prokram ba harukom kiba la pynlong ha NEIGRIHMS auditorium.
Ha kane ka prokram la donlang ruh u Prof. (Dr.) Balram Bhargava, Chief, Cardio-Thoracic Sciences Centre bad u Head, Department of Cardiology, AIIMS, New Delhi, uba dei ruh u Kongsan.
Ha ka jingkren, u Kongsan u la banjur bad kyntu ïa ki samla ba dang shu dep ïa ka jingpule doktor MBBS MD/MS Post Graduate, MSc. Nursing bad kiwei kiwei u la kyntu ïa ki ba kin ai ka jingshakri kaba paka haba ïadei bad ki nongpang.
Na ka liang u Prof. (Dr) Nalin Mehta, Director ka NEIGRIHMS, u la maitphang halor ka jingdonkam ka jingtreikam katkum ki kyndon bad ruh ka jingburom pat ïa ka jinglong kyrpang u nongpang. U kyntu ruh ïa ki samla pule ba kin ai ka jingshakri kaba khlem tyngkai na ka bynta ki nongpang kiba donkam shisha ïa ka jingïarap jong ki.
Na ka liang u Prof Animesh Mishra, Registrar, NEIGRIHMS pat u la ai ka jingkren pdiang sngewbha, katba u Prof G. K. Medhi, Dean, NEIGRIHMS, u la kren shaphang bunki kam kiba ïadei bad ka NEIGRIHMS.
Ha kane ka prokram, u Kongsan, u Prof. (Dr.) Balram Bhargava, u la sam ruh ïa ki syrnod sha ki samla kiba la pyndep ïa ka jingpule doktor (MBBS Students 2017 batch), nangta ki MD/MS Post Graduate Residents, bad M.Sc. Nursing Student, ryngkat ka khusnam ‘Best Outgoing Graduate’ la sam sha u Dr.
Debabrita Chakraborty.
Nalorkine, la sam ruh ïa ka khusnam Best Scientific Publication sha u Prof. T. Natung, HoD, Ophthalmology, Dr. Pranjal Phukan, Addl. Prof., Radiodiagnosis ha ka thup Faculty bad sha u Dr. Kalaragini Rajshekhar ha ka thup Resident Doctor. Kiwei pat ki khusnam ki kynthup ba la sam ki long naduh ka Best Oral Presentation, bad ka Best Poster Presentation ha ka lympung kaba la pynlong kum shi bynta ban pynphuh ïa ka 13th Annual Day jong ka NEIGRIHMS.
