Ba wan sakhi bam smai u PM, la pynjari da ka No Entry kylleng ka nongbah Shillong

0

Shillong, Lber 05 : Ka tnad pulit ka la rai ban pynjari da ka No Entry na ka bynta ka jingïaid ki kali ha nongbah Shillong ha ka 07tarik Lber na ka daw ka jingwan jong u Myntri Rangbahduh ka Ri, u Narendra Modi bad ruh u Myntri ka tnad Kampohiing ka Ri, u Amit Shah ban shim bynta ha ka jingthaw ïa ka sorkar ba thymmai ha Raj Bhavan.
“Kumta, khnang ban ïaid beit ka leit ka wan jong kitei ki VVIP ha ka jingwan jong ki bad ruh na ka bynta ka bit ka biang jong ki paidbah, yn pynjari da ka No Entry na ka bynta ka jingïaid ki kali ha kine ki surok kynthup ïa baroh ki surok ba pynïasoh ïa ki surok bah kiban ïaid da ki VVIP ha ka jingwan jong ki ha ka 7tarik naduh ka por 10.30 baje mynstep haduh 12.30 baje mynsngi,” ong ka kyrwoh ba la pyllait da u SP ka East Khasi Hills, u Dr. MGR Kumar ha kane ka sngi u Blei.
La pyntip ruh ba katei ka No Entry kan dei treikam naduh 7 Mer ter ter haduh Jingkieng Umshypi/Rilbong Point, na Khlieh na lad Iew/na lad Murgi Bazaar sha ki thain Upper Shillong bad Anjalee Petrol Pump – Civil Hospital Point, IGP Point – Kachari Point – Raj Bhavan, na lad Mahavir Park sha lain jingkieng Umshyrpi bad Anjalee PetrolPum, na Police Bazar sha Kachari Point – Raj Bhavan, na lad CS sha Raj Bhawan. Na lad Pinewood sha Raj Bhawan, na St Anthony’s College sha ki thain lad Gurudwara – lad AIR, na f Lower Lachumiere sha ki thain AIR – Raj Bhawan bad na Barrick Point sha ki thain Civil Hospital.
Shuh shuh la kyrpad ïa ki nongshong shnong ka nongbah Shillong bad ki jaka ba marjan ba kin kiar ban ïaid na kitei ki jaka bad sawdong ka nongbah Shillong lymda donkam lane na ki daw ba kyrkieh lane shim da kiwei pat ki lynti ban poi sha ki jaka jong ki, ong ka kyrwoh.

Leave A Reply

Your email address will not be published.