Da ki phew hajar ngut tuid ki paidbah sha ka jingïalang u bah Kyrmen Shylla

Pynshai u MLA barim jong ka Khliehriat halor ka jingshah kynnoh ba shihpew snem aiti ha kiba stad sahdien ka Constituency

0

Khliehriat rymphang 14: Da ki phew hajar ngut ki paidbah jong ka Khliehriat Constituency kiba kyrshan ïa u kyrtong jong ka United Democratic Party, u bah Kyrmen Shylla, mynta ka sngi la wan tuid sha ka jingïalang ïalap election ba la pynlong ha shnong Sohkymphor, ha kane ka jingïalang, u MLA barim u bah Justine Dkhar, u la pynshai ruh ïa kiei kiei, halor ka jingkynnoh pyrshah u bah Nehlang Lyngdoh uba la ong ba shiphew snem aiti ha kiba stad hynrei sahdien ka constituency.
U bah Kyrmen Shylla, kum u kyrtong u la ong ïa ki paidbah nongkyrshan jong u ba um duh jingkyrmen namar da kajuh ka jingieid bad kajuh ka jingshaniah kumba ki paidbah ki la pynpaw ha u snem 2018, mynta ruh un jop ha kane ka election “Phi la ieid, phi la shaniah ïa nga bad ngin ïatreilang kumba ju long, ki kam baroh kiba nga la trei, baroh ki dei ki hok jong phi kum ki paidbah” ong u bah Kyrmen.
U la kyrpad ruh ïa ki paidbah nongkyrshan ba ki dei ban long kiba skhem jingmut bad ruh ban long kiba kheiñ burom ïala ka jong ka vote, namar ka shi vote ka lah ban wahrah ïa ka jingkylla, u la ai ka jingkhublei sngew nguh namar ka jingieid bad jinsganiah ki paidbah ha kaba ma u ruh u ieid ïa ki paidbah baroh solonsar, u la pynpaw ruh katto katne ki kam kiba radbah kiba u la dep leh hapoh ka constituency, u la ong ba ha ka por ba u dang bat ïa ka kam kum u myntri jong ka tnat Social welfare, u la wanrah ïa ki Aganwadi Centre kiba bit ba biang, u la ïakhun haduh ba la lah ban kyntiew ïa ka jingsiew ba ju siew bai bnai ïa ki tymmen, ki khynnah ba don jingduna ha ki dkhot met, kumjuh ruh u la kyntiew ïa ki jaka ri khun swet bad shibun kiei kiei ki kam ba bha u la lah ban leh kum ki surok, ki lynti ki syngkien, ki skim bapher bapher kiba long ka jingmyntoi ïa ki paidbah, kumjuh ruh ha kaba ïadei bad ki kam ialahkai sport ban kyntiew ïa ki samla don sap, u la kyntu ïa ki paidbah nongkyrshan ba dei ban long kiba skhem jingmut bad kiba ïeng ha ka nongrim.
U MLA barim jong ka Khliehriat Constituency, u bah Justine Dkhar, u la pynshai paidbah shibun kiei kiei ki jingkylla kiba la lah ban wanrah hapoh ka constituency naduh ka por ba u dang long kum u MLA bad haduh ka por jong u bah Kyrmen Shylla, u la pynshai ruh halor ka jingkynnoh u bah Nehlang Lyngdoh, uba la ong ba shiphew snem u la aiti ha kiba stad, kaba mut san snem ha u bah Justine Dkhar bad san snem ha u bah Kyrmen Shylla, sahdien ka constituency khlem ka jingkylla “Mar ïa ioh District, haduh 65 percent ki ophis treikam nga la wanrah hapoh ka district, nga la wanrah ïa ka ophis (Building) jong u Deputy Commissioner, ka District Court (building), hato kane kam dei ka jingkylla? kumno nud ban ong ba aiti ha kiba stad shi phew snem ym don jingkylla? ka jingkieng ba iehnoh u bah Nehlang Lyngdoh nga pyndep ma nga, hato kam dei ka jingkylla? Na ka por sha ka por ngi wanrah ïa ki jingkylla ha ka imlang ka sahlang, mar ïa jop nga la shna ïa ka surok na Wapung sha Sohkymphor, kane kam dei mo ka jingkylla? ha ka por jong u bah Kyrmen Shylla pat, u la shna ïa ka surok u naduh Ladrymbai haduh Rymbai, na Kongong sha Lumshyrmit, na Rymbai sha Moolamanoh, u la wanrah ïa ki madam ïalehkai kiba bit ba biang, ha ka kam jngohkai pyrthei pat kum ha Sahksaw, ha Lumshyrmit, hato ym don ka jingkylla? ha ka por jong u bah Kyrmen Shylla pat, u la shna ïa ka surok naduh Ladrymbai haduh Rymbai, na Kongong sha Lumshyrmit, na Rymbai sha Moolamanoh, u la wanrah ïa ki madam ialehkai kiba bit ba biang, ha ka kam jngohkai pyrthei kum ha Sahksaw, ha Lumshyrmit, hato ym don ka jingkylla?” ong u bah Justine Dkhar.
U la kyntu ruh ïa ki paidbah nongkyrshan ba ki dei ban long kiba ïaineh ha ka nongrim, ban long kiba skhem jingmut, kumjuh ruh ba long kiba iatylli lang kawei.Kiba la ai jingkren ki kynthup ruh u Deputy CEM jong ka JHADC, u ba dei u MDC Tuber, u bah Lasky Rymbai, u Waheh Shnong Wapungskur, u bah Deo Dkhar, u Waheh Shnong Sohkynphor Poh Mission, u bah L.Langstang, u Secretary UDP Youth, u bah Heipormi Bang , u samla Shnalad Rymbai bad kiwei kiwei.

Leave A Reply

Your email address will not be published.