Shillong, Ïaiong 21 : Ka jinglah jong ka Aniesha Arengh ban ïalehkai bha ha kane ka sngi Ba-ar da kaba ïoh ban khur haduh 7 wiket na ki 13 ron ka la pynlong ïa ka Meghalaya ban jop da 6 wiket pyrshah ïa ka Sikkim ha ka lympung ïalehkai jong ka 2nd North East Rising Cup 2026 na ka bynta ki khynnah kynthei U-15 kaba long ha Guwahati.
Haba phai sha ka jingïakhun, dei ka Sikkim kaba la jied ban tied nyngkong bad khyllem lut ki nongtied ha ka por ba ka kynhun ka dang ïoh kamai tang 59 ron ha ki 18.2 over, kata na ki 35 over ba la buh. Baroh ki nongtied kim lah satia ban shan slem ha ka rukom kawang bol ba tbit jong ka Aniesha. Kiwei pat ki thei kawang bol ka kynhun kiba ïoh ban khur wiket ki kynthup ïa ka Badphihirta Nonglait (1/5), ka Laviola Mary L Mawlong (1/14) bad ka Onasa M Sangma (1/16).
Na ka liang ka Meghalaya haba beh ïa ka thong ka la lah ban pyndep da kaba duh noh saw ngut ki nongtied ha ki 14.1 over. Napdeng ki nongkamai ron kiba ïalehkai bha, ka Mebalapynkmen Syiemlieh ka la ïoh ban kamai 14 ron bad kylla long ka nongtied ba ïoh bun ron eh.
Ha kane ka sngi ka kynhun ïalehkai ka Meghalaya baroh kawei ka la deng da ki jingtehkti rong iong kum ka jingkynmaw burom ïa u Bah Dister Marbaniang, uba la khlad noh dang shen. Lah ban kdew hangne ba u Bah Dister u la bat kum u President jong ka East Khasi Hills Cricket Association bad ruh kum u Manager ha kiba bun ki kynhun ïalehkai jong ka MCA ha ki snem ba la dep.
Kane ka lympung ïalehkai kadei kaba la pynlong da ka thong ban kyntiew ïa ki thei ïalehkai kriket ba dang khie na ka thain shatei lam-mihngi jong ka Ri ïa kaba la lamphang da ka Assam Cricket Association.
