Pynkyndit ka Langsning ïa ka Lawbah, mad nam rem ka Maram FC ha Williamnagar, ïakhaid ka jingïakhun ha Amlarem bad Khliehriat

Shillong, Ïaiong 21 : Ka kynhun ïalehkai jong ka Langsning FC ka la hap ban ïakhun borbah haduh ba kan da lah ban pynliem noh ïa ka kynhun ïalehkai jong ka Lawbah SC da 5-3, ha ka lympung ïalehkai jong ka 5th Meghalaya State League, ba la pynïaid ïa ka da ka Meghalaya Football Association ha ka janmiet sngi Ba-ar.
Haba phai sha ka jingïakhun kabalong ha Mairang, na ka bynta ka Group F, ka Langsning FC ka la hap ba kan ïakhun tyngeh hadien ba u Nelsson Rymbai (7′, 10′, 88′) u la lam khmat ban thep ïa ki lai tylli ki kol. Hynrei ka dei ruh ka sien kaba nyngkong ba u rangïalehkai na ka liang pyrshah kata na ka Lawbah SC u Adonydevy Riwan u la ïoh lang ïa ka kabu ksiar ban thep lang lai kol ne hat-trick, kata ha ka minit ba 19, 45+1 bad ruh ha ka minit kaba 89.
Tangba, ka Langsning lyngba ki ar tylli ki kol na u Dajiedlang Wanshnong (33) bad na u Chusrang Sangma (42) ka la pynlong ïa ka kynhun ban khur suk ïa ka jingjop ha kane ka sngi.
Ha ka jingïakhun ha ka Group A pat, ka Khimusniang SC ka la ieng ïakhun tyngeh hadien ba ka la shah tam shwa shakhmat da shi kol bad kumta shwa ban kut ka por ïalehkai ka la ïoh kylla ban pynliem ïa ka Mawshun SC da 3-1 kol.
Katba ha ka jingïakhun jong ka Group B, ka kynhun ïalehkai jong ka Mawlum Tyrsad S&CC ka la lah ba kan pynliem noh ïa ka Mulang SC Nongbah da 4-2 kol.
Ha ka Group C pat, ka jingïalehkai hapdeng ka Amlarem SC pyrshah ïa ka Laskein S&CSC ka la kut noh ha ka jingïakhaid khlem da don mano mano ba lah ban ïa pynkhih ïa ka jar. Kane ka nam ïakhaid ka la bteng lang wat ha ka Group D hapdeng ka Shkenshynriah SC bad ka Thangskai Tiger SC, kaba la kut ha ka jingïakhaid khlem da don ba ïoh pynkhih jar.
Ha ka jingïakhun ha Williamnagar kaba dei na ka Group G, ka lynti ïaid khlem shah rem jong ka Maram FC ka la poi sha ka jingshah khanglad noh hakhmat ka kynhun ïalehkai ka Janepih YSCA kaba la jop ïa kane ka jingïakhun da 3-0 kol. Ïa kine ki kol jong ka Janepih la thep da u Edyson Ïawphniaw (26), Alphascius Sangriang (30) bad Wankuparlang Khardiengngan ha ka minit kaba 65.
Ha kawei pat ka jingïakhun ha ka Group H kaba long ha Mawkyrwat, ka kynhun ïalehkai jong ka Mawten SC ka la lah ba kan pynliem noh ïa ka Mawlarshong SC da 3-1 kol. Ha kane ka jingïakhun u Charles Lyngdoh u la rung ha ka thup kum u rangïalehkai ba nyngkong eh ban ïoh thep ïa ka kol kaba stet tam ha ka lympung namar u la ïoh ban pynkhih jar tang hapoh ka minit kaba lai jong ka kylla step kaba mut mar ïa sdang jong ka jingïakhun.
Ki jingïakhun ha kane ka sngi Balang pat, kan don tang kawei ka jingïakhun kaba dei jong ka Group G ha Williamnagar ha kaba ka Attong Matgrik FC kan mih madan ban ïakhun pyrshah ïa ka Balmanduri FC kaban long ha ka por 3:00 baje nohphai sngi.