Shillong, Ïaiong 21 : Ka kynhun ïalehkai jong ka Mawlai Sports Club kan mih ban aireng nyngkong eh pyrshah ïa ka Sikkim Brotherhood Football Club ha ka 27tarik mynta u bnai ha ka lympung ïalehkai jong ka I-League 3 kaban long ha Khuman Lampak Stadium, Imphal, Manipur.
Na ka liang u President ka Mawlai SC, Bah Marcel Kharbani haba kren bad ki lad pathai khubor u la ïathuh ba ka jingïoh jong ki ban rung sha kane ka lympung ha ka sien kaba nyngkong eh kadei hadien ba ki la ïoh ban rah ïa ka nam lahduh jong ka Meghalaya State League 2025-26.
Katkum ka jingïathuh jong u, ka Mawlai SC ka don ha ka Group A ryngkat ka FC Raengdai, Sikkim Brotherhood Football Club, Sunrise Club Orissa bad ka ARA FC.
“Ïa ka kynhun jong ka Mawlai SC yn ïalam bad coach da u bah Hering Shangpliang,” ong u President ka Mawlai SC. Shuh shuh u la ïathuh ruh ba tad haduh mynta ym shym la don ba kyrshan ïa ki, hynrei ki don katto katne ki riew rangbah kiba na Mawlai kiba la mih shakhmat ban kyrshan ïa ki.
“Ngi la ïakynduh ruh ïa ka sorkar ba kan ïarap kyrshan lang ïa ki bad ïa ki kot ki sla kiba ki donkam la dep phah lut, mynta ka shong pat sa ha ka sorkar. Hynrei tad haduh mynta pat ngim pat tip katno ngin ïoh na ka sorkar,” u la bynrap biang.
Na ka liang u coach Bah Hering Shapliang, u ïathuh ba kim shym la ïoh ban pynkhreh bha, namarba kim tikna bha la ka Mawlai kan ïoh rung ne em ban ïalehkai ïa ka I-League 3, dei tad haduh u bnai Lber mynta u snem ba ki ïoh jingtip bad naduh ka dei ka por ki la pyrshang katba lah ban pynkhreh ïa ka kynhun.
U ong ruh ba da ka jingrung ka Mawlai kan plie lad plie lynti de ïa kiwei ki kynhun da kaba ong ba lada ka Mawlai ka kiew sha ka I-League 2, kiwei ki kynhun ïoh pat ban ïa shim bynta ha ka I-League 3.
U ïathuh ruh ba ki don beit thik ki rangïalehkai na ka Jylla, lait noh tang uwei uba dei u rangshong ben ba ki hap ban pynrung na ka daw ba ki ïa takhuh bad ka Meghalaya State League kaba dang ïaid shaid shaid.
Halor ka jinglut jingsep pat u Secretary ka kynhun, Bah Mawkordor Nongsiej u pynpaw, ba baroh ka jinglut kan kot sha ka 50-60 lakh eiei. La ïathuh ba u nongmihkhmat ba mynta u la noh lyngba ka SRWP bad kyrpang halor ka I-League 3 ruh ki la dep ïa kynduh ïa u, ïa kaba u la dep kular ba un sa ïarap ïa ki watla kim pat tip pat katno kin ïoh.
Na ka liang u kapten ka Mawlai SC u Daman Bhalang Chyne u la pynpaw ba ka thong jong ki hi ki long ba kin ïoh rung sha ka I-League 2.
