Da ka skywalk ai ksai u CM na Barik sha Khyndailad, buh thong ban tei bun ki parking lot

Shillong, Naiwieng 16 : U Myntri Rangbah ka Jylla, Conrad K Sangma ha ka sngi Palei u la pynbna ba ka sorkar jylla ka la don ka jingthmu ban tei noh da ka skywalk lane ka jingkieng ïaid kjat naduh Barik Point ter ter haduh Khyndailad.
Haba kren bad ki lad pathai khubor hadien ka jingïalang jong ka kynhun Myntri, u Myntri Rangbah u la ong ba kane ka don mynta ha lynti ka jingpynkhreh. “Na ka liang ka tnad Pulit ki la pyntip ba tang shu sdang ka jingpyntrei ïa ka skywalk kan don ka jingdheng kali kaba jur bha bad kumta ngi hap ban pynkhreh lypa na bynta kine kine baroh,” u la ong.
Kumta, u la ong ba kawei ka bynta kaba ka sorkar ka pynkhreh mynta ka long ban don kham bun ki jaka pynieng kali sawdong katei ka jaka kynthup na ka bynta ki kali kamai.
“Kaba nyngkong hi ka long ba ki kali kim dei ban pynieng ha surok hynrei ba kin ieng ha ki jaka pynieng kali. Mynta ka jingïakhun ban don bun tylli ki parking lot ka la sdang bad shen phin sa ïohi ruh ba la kumno kumno ha u Kyllalyngkot ne Rymphang jong u snem ban wan ki bynta ha Nanpolok kan sa don la ka jong ka jaka pynieng kali,” u la ong.
Nalorkata, u ong ruh ba ki don ar tylli ki jaka sawdong ka Secretariat kiba la jied ban shna ïa ki jaka pynieng kali. U ong ruh ba da kine ki sienjam kan ïarap ba baroh ki kali kin ym ieng shuh ha ki surok ne lynti syngkien kumta kane kan ïarap ïa ka ïaid beit ki kali ha surok.
“Kawei pat kaba ngi pyrkhat ka long ban don la ka jong ka jaka pynieng na ka bynta ki taksi bad ki bos kamai bad kumba phi ïohi la ka long ha Khyndailad ne Motphran ki kali kamai ki lah ban ieng kyntiew briew tad haduh ban da dap. Mynta ngi dang pynkhreh halor kane ruh,” bynrap biang u Myntri Rangbah.
Ha kajuh ka por u la ong ruh ba ki pynshlur ruh ïa ki kmie ki kpa ban pyndonkam da ki school bus na ka bynta ban leit buh skul ïa ki khun ha jaka ban leit buh da ki kali shimet khnang ba kan ym wanrah than ïaka dheng kali.