Ka tiewlarun bad u Manik Raitong, ki kam sahnam u Pahep Rabon Singh Kharsuka

Shillong, Naiwieng 16 : Ka Rabon Sing Memorial Committee bad ka Thiar Lyngwiar Dpei Society, ryngkat ka Elaka Mawmluh, Mawmluh Sirdarship ha ka sngi Palei ki la kynmaw burom ïa ka lyngkhuh sngi ïap ba 113 jong u Pahep Rabon Sing Kharsuka, ba la ju tip ruh kum u Kpa ka Pyrkhat Khasi, ha ka prokram kaba la long hapoh ka Rabon Sing Memorial LP School Mawmluh.
La pynphuh ïa katei ka jingkynmaw burom da ka jingdonlang ka HoD Khasi Department, NEHU, Prof Streamlet Dkhar kum ka Kongsan ryngkat u Sirdar ka Elaka Mawmluh kum u Symbud Kongsan nalor ki bahaiing hasem bad ki khun ksiew jong utei u riewkhraw ba ka Jaidbynriew ka pynmih.
Na ka liang ka Kongsan ka la ai ka jingïaroh ïa ka shnong Mawmluh da kaba ong ba katei ka shnong ka la sei bun bha ki proh jabieng ha ka thoh ka tar, ki khraw pyrkhat kynthup ruh ïa ki nongak phlim.
“U Pahep Rabon Sing u la long u riewngeit Khristan bad u nongïalam ïa ki 3ngut ki sahep mishoneri hynrei u la buh shwa ïa ka Jaidbynriew Khasi hakhmat eh da kaba wad bad thoh shaphang ka Niam Khasi,” ong ka Kongsan.
Shuh shuh ka la ong ruh ba donkam ban buh jingthoh ïa ki jingïathuh khana da ka ktien shaphang ka jinglong ka Jaidbynriew Khasi khamtam halor ka Lyngwiar Dpei ne ban ïashong lang ban ïathuh khana, ïabam lang bad kiwei kiwei.
Na ka liang u Sirdar Mawmluh pat u la pynpaw ka jingsngew burom ïa ka iing ka em u Bah Ransom Sutnga bad Kong Eldora Lyngdoh ba dei Chairperson jong ka Rabon Sing Memorial Committee, kiba la kynmaw ïa kane ka shnong jong u Babu Rabon Sing Kharsuka.
U Bah Ransom u la pyntip ruh ba ka ïing ka sem jong u kan kyrshan pisa ban siew ïa ki nonghikai ka skul kumba 24 hajar tyngka shisnem bad u la ïathuh ruh ba u MP ka Rajya Sabha u Dr. WR Kharlukhi un ïarap 5 lak tyngka na ka bynta ban tei ïa ka kynroh jong ka skul.
Ha kane ka sngi la pyllait ruh ïa ka kot ‘Fables and Fictions of u Rabon Sing’ ïa kaba la pynkylla ktien na ka Khasi sha ka ktien Phareng da i Kong Eldora Lyngdoh.
Ka la don ruh ka jingkren lyngkot halor ka jingim u Parad Rabon Sing Kharsuka da i Kong C. Lyngdoh, Dkhot MPSC, ba dei ruh i ksiewtun jong u Pahep Rabon bad shaphang u synñiang ba la noh ha ka thoh ka tar Khasi, kum u nonghikai uba la smat ban sam ki jingnang jingstad, bad uba ieid Jaidbynriew, la kadei ha ka kolshor, ki jingthoh kiba u la leit lum lut ïa baroh ki phawar ki khun u Hynñiewtrep bad la pynsoh lang hapoh ka kitab phawar.
I la ïathuh ba u la thoh ïa ki saiñpyrkhat shaphang ka niam Khasi, bad kaba pynsahnam kadei ka jingïathuh khana puriskam kum ka Tiew Larun, u Manik Raitong bad kiwei kiwei.
Ka la don ruh ka jingsam ïa ki khusnam ba kyrpang sha kiba ïoh heh mark eh ha ka Khasi ha kaba ka Mazel C Nongkynrih ka la ïoh ha ka thup ki Bachelor of Arts (BA) bad ka Labianghun Kharmalki pat ha ka thup Master of Arts (MA)
La pynshongkun shuh shuh ïa kane ka prokram da ka jingrwai na ki khynnah skul ka Rabon Sing Memorial LP School Mawmluh.