Khliehriat, Naiwieng, 16: Ki Pulit ka East Jaiñtia Hills District kiba la ïoh ïa ka jingtip kaba bniah na ki tnat syntiat ha ka miet 12.30 baje shiteng synnia jong ka sngi Balang ba u don uwei u briew uba la tip kyrteng kum u Manoj Muksor uba wan na ka thaiñ Silchar ban rung sha Khliehriat, ïa uba la suba jur ba u kit lang bad ki tiar kiba long beaiñ, ki Pulit ki la pynlong ka jingpynap shrip ha Lumshnong bad talasi ïa ki kali kiba wan na kane ka thaiñ.
Ha ka talasi ïa ki kali, ki Pulit ki la ïoh bat ïa kawei ka taksi kamai kaba don ïa u nombar ML-11 3594 bad ki don ar ngut ki briew kiba shong hapoh kane ka kali ba kynthup u nongñiah.
Ki Pulit ki la pynlong ka jingkhynra ïa ki tiar ki tar jong kine ki ar ngut, kata jong u Manoj Muksor bad u Vicky Dkhar bad na ka pla jong u Manoj Muksor la lap bad kurup 2 tylli ki synduk sabon kiba don îa u powder rong saw byrtem uba don ka jingkhia kaba 21 grams bad na ka pla jong u Vicky Dkhar ki Pulit ki la lap bad kurup 34 tylli ki tynrong barit ba la thep ïa powder ba rongsaw byrtem uba don ïa ka jingkhia kaba 1.03 gram.
Hadien ka jingleh test ïa u powder la lap bad pynshisha ba u dei u drug Heroin bad baroh kine powder kiba dei ki drok herion kiba shongdor kumba T. 18 lak eiei.
Ki Pulit ki la lem noh ïa kine ki arngut ki basah ha ka shnong Mihmyntdu, West Jaiñtia Hills District bad ka jingtohkit ïa ki ka dang ïaid shakhmat.
