Rakhe ka Meghalaya ïa ka Viksit Bharat SankalpYatra ban pynthikna ba ki skhim Sorkar kin poi sha ki paidbah

By Mawphor News Desk On Nov 17, 2023

Shillong, Naiwieng 16: Ka Meghalaya ka la ïa shim bynta lang bad baroh kawei ka ri ban rakhe ïa ka jingsdang jong ka “Viksit Bharat SankalpYatra,” ka sienjam ban wanrah jingkylla kaba thmu ban pynpoi ïa ki kam sorkar sha ki jaka bym pat poi bad ka jingpynpoi ïa ki skhim Sorkar.
Ka jingpeit bniah jong kane ka yatra ka dei ban ai jingtip sha ki briew bad ban pynpoi ki jingmyntoi jong ki skhim kum ki lad na ka bynta ka jingkhuid jingsuba, ki jingshakri ha ki kam pisa, ka bording elektrik, ka jingïoh ïa ka tyndong LPG, ki ïing sah ïa ki briew kiba duna jingïoh.
Ka jingshngaiñ ha ka jingïoh mar bam, ka bam kaba tei met, ki lad ai jingsumar kiba shngaiñ, ka umdih kaba khuid bad kiwei kiwei. ïa ka jingpynrung kyrteng ïa kito kiba dei ban ïoh jingmyntoi yn leh katkum ki jingshem ba ïoh ha kane ka Yatra.
Ha Meghalaya, ka Viksit Bharat Yatra ka dei kaba la plie paidbah ha East Khasi Hills district mynta ka sngi. Ka Yatra kan long ha baroh ki Gram Panchayat (GP)/Block jong ka West Jaintia Hills, East Garo Hills bad North Garo Hills district ruh.
U Chief Secretary, Bah DP Wahlang u la pyllait paidbah ïa ka kali kaba rah ïa ka khubor jong ka “Viksit Bharat SankalpYatra” na Meghalaya Legislative Assembly Secretariat, Khyndailad, Shillong haba u la plie paidbah ruh ïa ka Jan Jatiya Gaurav Divas (Tribal Pride).
U la ban jur halor ka jingïeng skhem ka jylla halor ka Viksit Bharat Sankalp Yatra kaba long ha baroh kawei ka ri. Kane ka yatra ka dei ka dak jong ka sienjam kaba heh na ka bynta ka India kaba la kiew shaphrang bad kaba ai bynta ïa baroh ha kaba ka don ka jingbah khlieh jong baroh na ka bynta ka roi ka par bad ka jingriewspah jong ka ri, u la ong.
U Chief Secretary u la plie paidbah ruh ïa ka jingïaid kjat ban pyni ïa ka deiriti halor ka Tribal Pride da ki barikor, ki kynhun pyni deiriti. Ha ka prokram jong ka jylla ban rakhe ïa ka Jan Jatiya Gaurav Divas (Tribal Pride) kaba la pynlong ha U SosoTham Auditorium, Shillong.
U Myntri ka tnat Arts & Culture, u Bah Paul Lyngdohu la ïashim bynta kum u kongsan katba u CEM, KHADC, u Bah Pyniaid Syiem u la long u symbud kongsan.
La buh syntiew ha khmat ki mot jong ki riewshlur jong ka jylla da ki heh ki haiñ. La don ruh ka tribal museum kaba pyni ïa rukom shet, ki rukom shna tiar bad ka deiriti jong ki riewlum ha kane ka prokram.