Shillong, Naiwieng 16: U MLA ka Mawlai Constituency u Bah Brightstarwell Marbañiang mynta ka sngi u la phah da ka shithi sha u Symbud Myntri Rangbah ka jylla uba bat ruh ïa ka tnad PWD, u Bah Prestone Tynsong, ban dawa ba ka sorkar ka dei ban shim ki katto katne ki sienjam ban ïada ïa ki paidbah na kano kano ka jingjia aksiden kaba wanrah pat ïa ka jingduh ei wat ka jingim briew ne ka jinglong anna sah ha ki dkhot met ruh
Ha ka shithi u Bah Brightstarwell u la ong ba ka jingjia shah tynrah kali ne ar shaka bunsien ka dei na ka jingrak rak ki nongñiah kali bad thuk thuk khamtam eh da kito kiba dang khie samla bad ong ruh ba ka jingjia aksiden kan jin la duna jin lada ki bor ba dei peit kin kham pyrkhing ïa ka jingai driving licence.
Shuh shuh u la ong ba wat ki surok ruh ki dang duna palat ki jingtei jingshna ne proper infrastructure ne ki lad ban Ïada na ka jingjia aksiden.
Ha ka shithi u Bah Brightstarwell u la ai jingmut ba ka sorkar ka dei ban buh ïa ki speed breaker ha ki katto katne ki jaka ba i donkam, ban shna ïa ki lynti ïaid kjat ha shi lynter ka surok bah, ban kah ruh da ki jingker ne ki grill ïa kine ki lynti ïaid kjat, nangta ban shna ïa ki over brigde ne ki jingkieng ïaid kjat ban jam na shiliang sha shiliang surok, bad kham pynbiang ïa ka jingdon ki pulit pynïaid kali bad bad ïai pynlong ruh ka suprise checking ba man ka por ïa ki kali bad ki nongñiah kali bad ba ka sorkar ka dei ban pynbiang ïa ki jaka jam na shiliang sha shiliang surok ne ki zebra crossing.
Lah ban kdew hangne, u MLA ka Mawlai ha kine ki khyndiat taïew baladep, u la lum ïa ki Enhineer ka tnad PWD ban leit jngoh ïa ki surok khamtam ha ka National Highway kaba ïaid na Mawlai ban peit ïa ka jingma kaba ap ïa ki paidbah namar ka jingbymbiang ka rukom jingïada ïa ki paidbah ba ïaid ba ïeng ha ki surok bah.
