Pynjur jingïakhih ki ASHA sa ha Ri-Bhoi, ryngkat ki khunrit mih sha surok ban pynurlong ïaki mat jingdawa

Nongpoh, Naiwieng 16: Da ki spah ngut ki ASHA na kylleng ki jaka jong ka dong Ri-Bhoi hapoh ka lama ka Ri-Bhoi District ASHA Association mynta ka sngi kila mih paidbah sha surok ban ïaid rally ban pynurlong ïaki mat jingdawa naka sorkar ban pynkiew noh ïaka bainong kaba ki trei namar kim lah shuh ban ai jingshakri sah kumjuh bad ban trei mon sngewbha, naba ka jingkit kaba khia ka jingsiew kaba rit ha kaba naka liang ki ASHA kila pynlong ruh da ka jingïalang ha madan NSCA Pahamsyiem ha shuwa ba kin pynlong ïaka jingïaid Rally.
Ha katei ka sngi ka jingsdang ïakhih ki ASHA ha Ri-Bhoi la wan ruh ban ai jingkyrshan da ki kynhun sengbhalang bapher bapher, ki nongïalam ASHA haka jylla ba kynthup ïaka kong Mira June Myrsing President ka Meghalaya ASHA Workers Union, Kong Theresia Lyngdoh President ka Ri-Bhoi District ASHA Association, ka kong Tildarika Wardkhar President Umsning Unit bad kiwei kiwei ki riew rangbah kiba la wan ban ai jingkyrshan lang ha katei ka sngi, kynthup ruh ïaki longkmie ASHA kiba armet, bad don ruh kiba rah lang ryngkat ki khun rit ban ïaid rally na Madan NSCA Pahamsyiem haduh hakhmat ophis u Deputy Commissioner ka Ri-Bhoi.
Haba kren haka jingïalang shuwa ka jingïaid rally ki 2 ngut ki nongïalam jong ki ASHA kiba kynthup ïaka Kong Mira June Myrsing ka President jong ka MAWU bad ka Kong Tilda Wardkhar President Umsning Unit, ki la ther tyngeh ïaka Dr. Ampareen Lyngdoh kaba dei ka myntri sorkar kaba dei peit ïaka tnad ka koit ka khiah halor ka jingkren jong ka ha ki lad pathai khubor hakaba ka myntri ka la kyntait ïaka jing kam ba ki ASHA ki ïoh tang 66 tyngka shisngi, hynrei ka myntri ka la ïathuh ba ki don naki ASHA ki la ïoh ïaka jingsiew kaba 18 hajar tyngka naka bynta 6 bnai bad kiba bun na ki ASHA kiba la ïoh 28 hajar bad 32 hajar tyngka ha kaba naka liang kitei ki nongïalam kila pynpaw ruh ba ki don ki sakhi satar kiba biang katno ki ASHA ki ioh jingsiew.
Kitei ki arngut ki nongïalam jong ki ASHA ki la ong ba Dr. Amparene ka la kren tohmet shaba palat bad ka la jler sha ba palat bad kane ka jingsiew sha ki ASHA katkum ka jing ong jong ka Dr. Ampareen ka la kot bad ka tulop MLA bad lada ka dei kumta ka Amparene ka la dei ban ieh noh ïa ka kam kum ka MLA bad ban trei noh kum ki ASHA.
Ki la ïathuh haka jingïa kynduh kaba nyngkong bad ka myntri jong ka tnad ka koit ka khiah naka liang ka Dr. Amparene ka la ong ba kan leit ban ïa kynduh bad u Myntri Rangbah ban kren halor kane ka jingeh jong ki ASHA, hynrei kaba sngew lyngngoh ka long ban ïohi pat ha ki lad pathai khubor ba ka jingkren jong ka Amparene ka la long kum ka wait prad ñiut naka bynta ki nongtrei ASHA bad ka la pynlong ïa ki nongtrei ASHA kum ki dustbin hakaba baroh ki ñiut ka la thep lut ha ki ASHA.
Shuh shuh kitei ka nongïalam jong ki ASHA ki la ong ruh ba “Kum ka riewstad phi la trei ïaka kam kum ka Myntri jong ka sorkar phi dei ruh ban kren ïaki kyntien kum ki riew stad bad kum ki riew shai ym ban kren kum ki riewdum namar haba sdang ïa kane ka kam ki la sdang kum ki nongtrei mon sngewbha hynrei kam shym la don kata ka jingïasoi soskular jong ki ASHA ban treimon sngewbha baroh shi jingim kum ba la kam da ka Dr. Ampareen.
Naka liang ki ASHA kila pynpaw ruh ba lada ka sorkar ka dang sngap mynthi halor kane ka jingdawa naka liang jong ki kin dang bteng ban dawa bad ban pynjur ka jingïakhih haka jylla baroh kawei ba ka sorkar kam dei ban shu ñion ïaki tang haka kam hynrei ban peit ruh ïaka jingeh jong ki bad khamtam ban pynurlong ïaki mat jingdawa.