Nongpoh, Ïaiong 14: Kum ka jingburom ban ai khusnam ïaki Polling Station kaba ioh khur bun vote tam, kumba u la kular shuwa ka elekshon, u Bah Mayral Born Syiem u la pyndep ïaka kular ban pynkup bad leh burom syndon ïaki Polling Station kiba la kyrshan bun vote tam hadien ba ki la ai jingkyrshan met bad mynsiem ban pynjop don burom ïa u ha kane ka elekshon ba la dep.
Ïa katei ka jing pynkup burom la pynlong ha ka janmiet jong ka 13 tarik Ïaiong, haka shnong Paham syiem kaba dei ruh ka shnong kaba la wan shakhmat haka jingioh bun vote hadien ba u Bah Mayral Born Syiem kum u kyrtong ka UDP u la ioh ban khur haduh 644 vote.
Kum ka dak ka jingsngewnguh ïa katei ka Polling Station naka liang u MLA u la ai ruh da ka song pisa kaba T.1 Lakh ryngkat ka momento kum ka jingsah jingkynmaw halor ka jingleh bha jong katei ka Polling Station ban pynjop donburom ïa u.
Ha katei ka jingpynkup burom la sakhi ruh da ka jingdonlang u Bah Balajied Ranee MDC ka Nongpoh, u Bah Jedwin Lyngdoh Rangbah Shnong bad ki paidbah nongshong shnong jong katei ka shnong.
Naka liang u Bah Mayral Born Syiem un sa leit ruh ban burom sa ïa kiwei pat ki shnong kiba kynthup ïa ka Umsaw Nongbri kaba wan ba ar kaba la ioh 625 vote bad ka Polling Station Diwon ka la wan ba lai kaba la ioh 557 vote bad kumjuh ïa ki polling station ki ba bun vote lyngba ki percentage, kitei ki shnong ki kynthup ïa ka Polling Station Jermanai ka la wan nyngkong kaba la ioh 74.29%, ka Umsaw Nongbri ba ar ka la ioh 71.83% bad ka Mawryng kang ka la ioh 70.79%.
