Da ka jingmareh-thong pynlong ka Life Care Foundation ban pynkhlaiñ ïa ka jingïaleh pyrshah ïa u drok
Mawkyrwat, Jylliew 27: Kum shibynta ban rakhe ïa ka sngi ïaleh pyrshah ïa u drok bad ka jingkhaïi be-aiñ ïa u kaba ki khot ha ka ktien nongwei ka ‘’International Day Against Drug Abuse & Illicit Trafficking’, na ka lang ka Life Care Foundation – Rehabilitation and Counselling Centre, Sohkhyllam, Mawkyrwat, South West Khasi Hills District mynta ka sngi ka 26 tarik u Jylliew, 2026 ka la pynlong ïa ka jingïamareh Marathon kaba la sdang na phyllaw jong ka Maharam Government Higher Secondary School, Mawkyrwat.
Ka phang pdeng jong kane ka jingïakob marehthong ka long “Run for a Drug-Free India – Ong beit ‘Ynnai’ ïa u Drok”, ha kaba ka thmu ban pynsngewthuh ïa ki paidbah, khamtam ïa ki samla, halor ki jingma kiba mih na ka jingdih bad jingïadon jong u drok bad ban kyntu ïa ki ban im ka jingim kaba koit ba khiah bad lait na kino kino ki jingdih pynbuaid.
La sdang ïa ka jingïamareh na phyllaw jong ka Maharam Higher Secondary School sha surok shnong Nonglang bad la pynkut biang ha Maharam Higher Secondary School. Ki samla bad ki paidbah kiba bun ki la ïa shimbynta shitrhem ha kane ka prokram, da kaba pynpaw ïa ka jingkyrshan jong ki ïa ka jingïakhun pyrshah ïa u drok.
Lah ban kdew ruh ba ka Life Care Foundation, lyngba ka Rehabilitation and Counselling Centre kaba don ha Sohkhyllam, ka don ha ka ïa ka thong ban ïarap ïa kiba bun ki samla kiba kwah ban kylla noh ïa ka jingim jong ki, khamtam ïa kito kiba wan na ki longïing kiba duna ka ïoh ka kot hapoh ka South West Khasi Hills District. Lyngba ka jingsumar, jingïasyllok bad ka jingkyrshan, bun na ki samla kiba sdang pat ban noh ka jingim kaba thymmai.
Hashwa ban sdang ïa ka jingïamareh, la ïoh ruh ïa ka jingkren na uwei u samla uba la dep ban ïoh jingsumar bad jingïasyllok na ka Rehabilitation and Counselling Centre. Ha ka jingkren jong u, u la phla ba ka jingïarap ba u la ïoh na ka Centre ka la pynkylla pura ïa ka jingim jong u, bad mynta u im da ka jingkyrmen bad ka jingthmu ban long ka nuksa kaba bha ïa kiwei pat ki samla kiba dang don ha ka lynti ban lait na une u jingdih uba sniew.
Ki nongjop ha kane ka jingïakop ki long u Wonderful Paliar, u Angelkumar Wahlang bad u Bankerlang Kharjahrin jong ki khynnah shynrang bad jong ki khynnah kynthei ki long ka Lyntijingkyrmen Kharjahrin, ka Elfidary Wartde, bad ka Larisha Thongnibah bad ka khusnam nongwan ïashimbynta ba khynnah tam dei u Lamshuwa Wanniang.
Kiba la donlang ha kane ka sngi ki kynthup naduh u bah E. Tariang, District Social Welfare Officer, South West Khasi Hills District, u bah R. Rymbai, Officer In-charge Traffic Mawkyrwat Police Station, u bah Bording Lyngdoh, Administrative Officer Foundation Rehabilitation and Counseling Centre, u bah F.D. Ramsiej, Chairman Life Care Foundation Rehabilitation and Counseling Centre, u bah Steppingstone Syiemlieh, Secretary Life Care Foundation Rehabilitation and Counseling Centre, ki riew rangbah lem bad ki nongïashimbynta ha ka jingmareh thong kynthup ïa ki shynrang bad kynthei.