Rah nam lahduh ka Dong Pyndenbah ha ka Interdong FT 2025-26 jong ki samla shynrang ha Nonglang

Nonglang, Jylliew 26: Ka Dong Pyndenbah ka la long ka lahduh ha ka lympung ïalehkai kynjatbot ba la tip kum ka Tournament Football Interdong jong ki samla shynrang na ka bynta u snem 2025-26 ba la pynlong da ka Nonglang Sports Club ha madan Pyndenïewlyngdoh, Nonglang, South West Khasi Hills District.
Ka jingjop jong ka Dong Pyndenbah ïa ka nam lahduh ka dei hadien ba ka la ïoh ban khur 3 – 2 kol pyrshah ïa ka Dong Pdengshnong ha ka jingïakhun phainal.
Lah ban kdew ba ha ka jingïalehkai phainal, ka Dong Pdengshnong ka la ïakynduh pyrshah ïa ka Dong Pyndenbah ha ka jingïalehkai kaba itynnad bad kaba shongshit bha naduh kaba sdang namar ha ka jingïalehkai, ka Dong Pdengshnong ka la ïoh ban pynkhihjar nyngkong eh lyngba u Wandorlang Kharraswai ha ka minit kaba 5, bad haduh kaba kut ka kyllastep ka la tam da 1 – 0 kol.
Haba bteng pat ïa ka jingïalehkai ha ka kyllamiet, baroh ar tylli ki dong ki la ïakhun tyngeh bha khnang ban ïoh ïa jingjop, hynrei hapdeng jong ka jingïakhun ha ka minit kaba 84, ka Dong Pyndenbah ka la ïoh ban pynïakhaid lyngba u Wanpli Snaitang. Kumta haduh kaba kut ka por jong ka jingïalehkai kaba 90 minit, ka jingïalehkai ka la kut ha ka jingïakhaid mar shi kol bad ym shym la don mano mano ruh ba lah ban pynjop.
Namarkata, la hap ban rai ïa ka nam lahduh lyngba ka jingïashut Tie-Breaker, ha kaba ka Dong Pyndenbah ka la jop da 3 – 2 kol pyrshah ïa ka Dong Pdengshnong bad rah ïa ka nam lahduh jong kane ka lympung.
Ha kaba kut jong ka jingïalehkai, ïa ka khusnam ‘rangïalehkai ba tbit la ïoh da u Francis Kharlyngdoh, ‘nongap ‘dien ba tbit da u Reebok Snaitang, nongthep bun kol da u Kynsailin Marweiñ, nongap kol ba tbit da u Rebertson Snaitang, katba ïa ka khusnam ‘rangïalehkai ba tbit ha ka jingïalehkai jong ka phainal la ïoh rah da u Wandorlang Kharraswai.
U Bah E. Tariang, District Social Welfare Officer, South West Khasi Hills District, u la long u kongsan ha kaba u la shim ruh ïa ka bynta ban khang ne pyrda ïa kane ka lympung jingïalehkai ha ryngkat ka jingdonlang u , u Bah Firsterlin Kharraswai, Myntri Shnong Nonglang, u Bah Syntarlin Snaitang, President ka Nonglang Sports Club, u Bah Kordorlyne Kharlyngdoh, Secretary ka Nonglang Sports Club, u Bah Angelbert Snaitang uba la long u nongpynïaid ïa ka prokram bad ïa ka tournament naduh kaba sdang, ryngkat bad kiwei pat ki rangbah shnong, ki riew paidbah bad ki samla shnong.