Lap ka JNC lyngba ka RTI ba ki briew na EJHD ki khlem ïoh jingïarap na ka Mining & Geology

Khliehriat Jylliew 26: Mynta ka sngi ka 26 tarik u Jylliew, ki nongïalam bad ki dkhot jong ka Jaiñtia National Council (JNC) Central Executive Committee hapoh ka jingïalam u President Rangbah, u Bah Sambormi Lyngdoh ki la ïakynduh bad u Bah Kyrmen Shylla, uba dei u MLA jong ka Khliehriat bad uba long ruh u Adviser jong ka tnat Mining Geology jong ka sorkar jylla, kane ka jingïakynduh ka seng ka long halor ka mat ba ïatyngkhuh bad ka Meghalaya Environment Protection and Restoration Fund (MEPRF) kaba dei ka fund ne ka mang tyngka kaba na ka bynta ban pynneh pynsah ïa ka mariang bad khamtam kaba dei ka lad ai jingïarap ïa kito ki lanot kiba shah ktah na ka kam tih dewïong, ïa kane ka fund la phah shna da ka NGT hadien ka jingkhang ban tih dewïong kata ha u 2014.
La ong ba ha ka jingbuddien jong ka seng lyngba ka RTI la lap ïa kiei kiei kiba ym sngew lah ban mutdur bad kiba pynglynngoh ruh shikatdei eh ïa ka seng ha kaba katkum ki jingkylli ba la buh ba haduh katno ngut ki briew ne ki longïing kiba la ïoh ïa ki jingïarap bad kaei kaba ka tnat Mining and Geology ka la leh na ka bynta kine ki briew kiba shah ktah, ka jubab ba ka seng ka la ïoh bad kaba pynsngewsih ka long ba ka jubab ka ong, “Not available”
“Te mynta ka Sngi da ka jingsngewkhia na ka bynta ki briew la jong khamtam ïa kito kiba shah ktah ngi la wan ryngkat bad ka jingthoh sha u Adviser ka Mining and Geology ban kyrpad ïa ka sorkar jylla lyngba u bah Kyrmen Shylla ban phah thaw ne instruct ïa ki District Level committee ba kan leh ïa kaba donkam da kaba pynlong ïa ka jingjurip ïa kito ki longïing longsem kiba shah ktah bad ban ai ruh ka jingïarap lyngba ka Meghalaya Environment Protection and Restoration Fund (MEPRF) bad ngi la lap ruh ba haduh T400 klur tam ka pisa kaba don hapoh kane ka mang tyngka jong ka MEPRF,” ong u nongïalam ka JNC.
“Na ka Liang u Adviser, bah Kyrmen Shylla ula ai ka jingkular ïa ka seng ban un shimkhia ïa kane ka kam bad ba un rah ïa ka sha u myntri jong ka tnat Mining and Geology department, na ka liang ka seng ruh kan sa ban jur ba kan sa pynbor ïa ka sorkar jylla na ka bynta ban pynioh ïa ka hok jong ki paidbah” ong u nongialam ka JNC.
Shuh shuh, ka seng ka la ïathuh ba kane ka jingïakynduh bad u Bah Kyrmen Shylla, ka dei ruh shibynta ha ka jingïadei bad ka guidelines jong katei ka fund kaba shiphew percent na ka kam khaïï (transport) ïa u dewïong na ki challan ka dei ban rung shapoh katei ka fund na ka bynta ban pyndonkam ban pynbha pynmiat ïa ki jaka kiba la jot la pra na ka jingtih dewïong bad kaba ar kadei ban ïarap ïa ki longïing kiba shah ktah
“Dang ha kine ki sngi ruh haba phai sha kawei na ki jingïakynduh jong ki Association ba trei dewïong bad u Chief Secretary ka jylla, ngi iohi ba wat u chief secretary ruh ula ong ha ki ba don ka fund jong ka MEPRF na ka bynta ban ïarap ïa kito kiba shah ktah na ka kam tih dewïong bad ka jingkylli kaba ngi kwah ban buh hakhmat u Chief Secretary bad hakhmat u myntri ba dei peit ïa ka tnat Mining and Geology ba balei ym shym la pyndonkam ban ïarap ïa kito kiba shah ktah, ka ioh ka kot kala hiar bha ha East Jaiñtia Hills jong ngi bad ktah ruh ïa ka jylla hi baroh kawei naduh ba la khang ïa ka jingtrei dewïong, hynrei kaba sngewsih ka long ba haba don ka fund ka mang tyngka balei pat kam iaid sha kaba dei ban iaid, hooid don ka jingpyndonkam ïa ka kum ban pynbha pynmiat bad ban pynim ïa ka mariang bad ïa kane ruh ngin sa tih bniah, hynrei ka phang kaba ngi wan hangne kadei ban dawa ïa ka hok Jong kito kiba shah ktah naka kam tih dewïong”, ong u President ka JNC, Sambormi Lyngdoh.