Nongpoh, K’lyngkot, 28: Da ka mynsiem jong ka jingriewblei ki paid Khristan ka Balang Katholik Pahambir mynta ka sngi u Blei ki la pynkut noh ïa ka jingrakhe ïa jubili ksiar kaba dei ka lyngkhuh dap 50 snem ka Balang katholik Pahambir naduh ba la seng ïa ka ha u snem 1974 kum ka kynhun balang barit bad mynta kane ka balang ka la dang san bad dang roi ha ka jingngeit ba hap ha ka Nongpoh Parish.
Haba pynkut ïa kane ka jubili ksiar la sdang da ka mass bakhuid ha ka por mynstep ha kaba u Fr. Roland Kharkrang u la shim ïa ka bynta ba kongsan ban pynbynta ïa ka niam ka rukom ba la shim bynta da ki hajar ngut ki paid riewngeit kiba la wan ban sakhi ïa kane ka jingpynkut noh ïa la jingrakhe ïa ka jubili ksiar ka Balang Katholik Pahambir.
La sakhi lang ruh ha kane ka sngi da ka jingdon lang u Bah Balajied Ranee, MDC ka Nongpoh, u Fr. Lawrence Nongkseh, Rev Fr. Charles Sangma, Rev Fr. Felix Aiban Kleiñ, ki sister, ki rangbah balang bad ki paid riewngeit ka Balang Katholik.
U Fr. Roland Kharkrang, nalor ba la shim bynta ban pyndep ïa ka niam ka rukom ha ka Mass Bakhuid, u la pashad ruh ïa ki kyntien blei da kaba ong, “U blei u la ai ïaka mon kaba lait luid ha ngi ki briew, lada ngi mon ban leh ïaka ba sniew khlem ka jingpynbor jongno jongno to kit hi maphi ïaka pop bad lada ngi leh ïaka ba bha khlem ka jingpynbor to ngin khmieh lynti ïaka bainong kaba bha.
U la ong ruh, ka jing khot jingwer jong u Blei lyngba kane ka sngi ka long to leit phai sha la iing da kawei pat ka lynti bad klet ïaka lynti kaba phi wan. U Fr. Roland Kharkrang hangne u la pynshai ruh ïa kitei ki kyntien kaba u mut ban ong ka long, to klet noh ïa kiei kiei ki ba la dep la phi la kum leh Pop ne leh bakla haka lynti ïaid hynrei to pynkylla noh ïa la ka jingim da kaba phai sha ka lynti kaba bha bad sha ka lynti jong u Blei.
Ha ka por nohphai sngi, la pynsngew pynsngap ïaki sur jingrwai kiba thiang kiba la rwai da ki khun samla jong ka Balang bad ha kajuh kapor la ïoh ruh ban pyni ïaki jingshad bad jingtem tynrai bad la ïoh ruh ban pynkup burom naduh ki Father, ki sister, ki Rangbah Balang, Ki longkmie longkpa, ki riew tymmen kiba la long Kristan nyngkong ha katei ka shnong bad la pynkut pat da ka jingpynhap ïa la mada jubili ksiar da u MDC ka Nongpoh, u Bah Balajied Rani ha ryngkat ka jinglang ki phadar ki sister bad ki riewngeit ka Balang Katholik.
