Jowai, K’Lyngkot 28 : Ha ka janmiet jong ka 26 tarik u Kyllalyngkot, 2024 ka jingphohsniew jong i kong Lily Tariang kaba shong ba sah ha Hawai Bhoi, hapoh Amlarem C&RD Block, West Jaiñtia Hills kala urlong, haba u Additional Deputy Commissioner and Project Director of DRDA, West Jaiñtia Hills u bah F. B. Basan ryngkat kiba ïatrei lang ula aiti ïa kawei ka ïing ba la thaw khnang na ka bynta jong i kong Lily Tariang.
Ïa katei ka ïing la thaw na ka skhim Pradhan Mantri Awas Yojana – Gramin (PMAY-G) ryngkat ka jingïanoh synñiang na ka Jaiñtia Hills Development Society lyngba ka KHUBLEI Germany lem bad ka jingïanoh synñiang jong kiwei de kaba la kot sha ka Rs.3,32,000/- tyngka. Naka PMAY la pynïoh pisa Rs.1,30,000/-, na ka MGNREGA Rs.22,000/- na ka KHUBLEI Germany Rs. 1,70,000/- bad na ka Pynskhem Village Organisation (VO) la synniang Rs.10,000/- tyngka.
Kane ka ïing kan ai jingïada ïa ka kong Lily Tariang bad u lok lem bad ki 3 ngut ki khunksiew basah khunswet kiba la duh noh ïala ka kmie bad mynta ki ïashong ïasah ryngkat bad kine ki kmierat kparat.
Kiwei de kiba ïadon lang ha kane ka sngi ki kynthup ïa u SDO Amlarem Civil Sub-Division, Amlarem u Dr. Abhiskek Saini, IAS, u Asst. Commissioner and Amlarem C&RD Block Development Officer u bah GLC Mylliem, u Director jong ka JHDS u Fr. Manbha Pakem, ki nongtrei jong ka MSRLS, ki dkhot jong ka SHG bad ki nongshong shnong ka Hawai Bhoi.
U bah Basan ula ong ba ka PMAY (G) ka dei ka mission jong ka sorkar India na ka bynta ban pynioh ïing sha ki briew kiba shah sha ki thaiñ nongkyndong. U la ong ruh ba kane ka dei ka ïing kaba ar kaba la ïatreilang bad ka JHDS. Kaba nyngkong ka dei ha shnong Moosakhia kaba la aiti sha ki trai ha ka 23 tarik u December 2023.
U bah Basan u ong ba ka jingïatrei lang na ka bynta ban wanrah ïa ka roi ka par ka long kaba donkam haduh katta katta bad ka long ruh ba ka jingïatylli bad ka jingïasnohkti lang ka pynlah ban poi sha ka thong. U la ai khublei kyrpang ruh ïa ka KHUBLEI Germany lyngba ka JHDS kala la ïasnohkti lang ban tei ïa kane ka ïing bad khmih lynti ba kan dang ïai bteng shuh shuh ka jingïadei kam ha ki snem ban wan. Kumjuh ïa ka ophis jong u BDO Amarem, ïa ki nongïalamshnong, nongïalam ka VO kiba la shimkhia ban pyndep tei ïa kane ka ïing tang hapoh 90 sngi.
Na ka liang ka kong Lily bad u lok jong ka, ki pynpaw ka jingkmen bad ka jingsngewnguh ïa baroh kiba don bynta ban pynïoh ïa ki ïa kane ka ïingsah kaba itynnad bad ba skhem bha.
