Pyni ki samla ïa ki ktien ba kongsan ka Riti Synshar ha ka jingrakhe Republic Day ha Pynursla
Shillong, Kyllalyngkot 28 : Ka Republic Day ba 75 snem lane ka sngi ba ka Ri India ka pdiang pyntreikam ïa ka Riti Synshar, ha Pynursla Civil Sub-Division la rakhe hapdeng ka jingshongkun da ka jingïashim bynta ki skul ki kolej na katei ka thaiñ myn ha ka 26 tarik u Kyllalyngkot, 2024.
Ha kane ka sngi ki samla pule ka Riwar College Pynursla ki la rah da ki placard kiba thoh ïa ki kyntien ba kongsan kiba la pruid dak ha ka Riti Synshar ka Ri India lane ka Constitution haba ïa shim bynta ban ai ïa ka jingrwai bad jingshad ha ryngkat ka riam tynrai ha kane ka sngi ha madan Urksew Wahpathaw, Pynursla ba la pynlong da ka ophis Pynursla Civil Sub-Division ha ka 26 tarik u Kyllalyngkot, 2024.
Kine ki kyntien kiba long kum ka jingpynkynmaw ïa ka hok ki nongshong shnong kumba la pruid dak ha ka Riti Synshar kum ka hok ban jied bad synshar dalade (sovereignty) , ka jingbym thew la ki nongshong shnong ki don ha kano kano ka jingngeit niam (secular) , ka jingïaryngkat para briew (socialist) , ka jingsynshar kaba long da ka synshar paidbah bad kaba laituid lem ki kyndon (democratic republic), ka jingbishar hok (justice), ka jingim laitluid (liberty) , ka jingïoh kaba mar katjuh ïa ki hok longbriew manbriew (equality) bad ka jingsngewthuh jingmut wat hapdeng ka jingïalong kynhun ne (fraternity).
Ka jingrwai bad ka jingpyni jong ki ka la pynlong ïa ka Riwar College ban jop ruh ïa ka kyrdan ba nyngkong ha ka jingïapyni sap rwai sap shad ha kane ka sngi katba ïa ka kyrdan ba ar pat la jop da ka Asorphi Academy Higher Secondary School, Pynursla bad ïa ka kyrdan ba lai pat la rah da ka Seng Khasi Riwar Mihngi Higher Secondary School, Pynursla.
Ha kane ka sngi, u Bah Banteidor Lyngdoh, MLA ka Mawkynrew Constituency u la wan ban shim bynta kum u Chief Guest kane ka jingrakhe bad shim ruh ïa ka Rashtriya Salute jong ka Republic Day Parade ba la ïa shim bynta da ki skul kiba don ha ka thaiñ Pynursla ha ka jingïasynran lang ka Kong EL Warjri, SDO ka Pynursla Civil Sub-Division bad u KN Sangma, Dy Superintendent of Police.
Ka skul kaba la ïoh khur bun eh ki points bad wan ba nyngkong ha ka Republic Day Parade dei ka NEIMA SSA Upper Primary School, Laitmynrieng katba ïa ka kyrdan ba ar pat la ïoh da ka Raid Shabong Border Area Government Upper Primary School, Boy Contingent bad ïa ka kyrdan ba lai pat la ïoh da ka Pdeng Raid Border Area Secondary School, Urksew Wahpathaw.
Ka ophis Pynursla Civil Sub-Division ha kane ka sngi ka la pynkup burom ruh ïa saw ngut ki rangbah ki ban shongthait noh na ki kam ba ki trei ba kynthup ïa u Bah Marshall Pohshna, u Bah Thersing Samiam, u Bah Pasang Lyngdoh bad u Bah Bernard Kharnary kiba dei ruh ki nongsaiñdur ïa ka Pynursla C&RD Block.
Haba ai jingkren mar ïa dep jurip ïa ki kynhun ba shim bynta ha ka Republic Day Parade kumba ju long ka rukom kum u kongsan, u Bah Banteidor u la ong ba ha ka snem ba la dep ka jylla ka la mad ïa ka shongsuk shongshngaiñ bad la ïaid sha khmat ruh ban pynbeit ïa ki kam khappud hapdeng ka Meghalaya bad Assam.
U la kdew ruh ïa ki kam kiba la trei da ka Sorkar Jylla kum ka jingpynkhlaiñ ïa ki bor pulit ha kaba yn thungkam shuh sa 3000 ngut ha ka tnad. U la pyntip ba ïa u motdur ba shi rynïeng u Tirot Sing Syiem yn sa plie paidbah ha ka 16 tarik u Rymphang, 2024 ha Dhaka.
Hadien kane, u Bah Banteidor ha ryngkat ka jingïadon lang ka ka Kong EL Warjri, SD0, u KN Sangma, Dy SP, u Bah Lamche Kharmon, BDO ka Pynursla C&RD Block, ki bor pulit ka Pynursla PS, ki ophisar bad nongtrei na ki tnad bapher bapher kiba don ha ka Civil Sub-Division ki la leit ban ai jingïarap sha kiba thiah pang bad shah sumar ha Pynursla CHC.
Hadien katei, ka kynhun ka la leit ruh ban noh jingïarap sha ka jaka ri khynnah khun swet ka North East India Mission Association (NEIMA) kaba don ha Laitmynrieng, Pynursla da ki tiar skul bad na ka liang u Bah Banteidor u la ai jingïarap da ka pisa.