Dhaka, Naitung 20: Kumba 245 ngut ki nong India ki la wanphai ïing noh na ka jingïakhih kaba jur kaba la jia ha ri Bangladesh, ha kaba kane ka jingïakhih kaba jur ka la neh kumba 3 taïew, bad kane ka la jur bha ha kane ka taïew ha nongbah Dhaka ri Bangladesh, ong ki lad pathai khubor na katei ka ri.
Ki bor sorkar jong ka ri Bangladesh ki la pynjari syndon da ka curfew ha baroh kawei ka ri halor kane ka jingïakhih kaba jur kaba la saphriang ha kylleng ka ri halor ka bhah aikam aijam ka sorkar. Kane ka jingïakhih ka la long hapdeng ki samla pule bad ki pulit kaba la lam sha ka jingïap jong ki 105 ngut ki briew.
Ha kawei ka liang kumba 245 ngut ki nongshong shnong ka India ki la wanphai ïing noh hadien ba ki la ïaid bad rung lyngba ki border point kiba don ha ka thaiñ shatei lammihngi ka ri India ha ka sngi Thohdieng ha kine ki 3 taïew ba la leit.
Haba kren sha ki nongshong shnong ka ri, ka Myntri Rangbah duh ka ri Bangladesh ka Sheikh Hasina ka la khot ïa ki samla pule ban wan sha ka meij jingïakren khnang ban lah ban tem ïa kane ka jingkynad da kaba suk kaba saiñ.
Halor kane ka jinglong jingman ym pat lah ban thikna la ki samla pule kin pdiang ne em ïa kane ka jingtyrwa jong ka sorkar. Kine kiba ïakhih ki la dawa na ka sorkar ba ka dei ban pyndam noh ïa ka bhah kam kaba 30% ki kam sorkar na ka bynta ki longïing jong kito kiba la ïakhun ïa ka thma laitluid ha u snem 1971 bad ka ri Pakistan.
